Deba - Lastur - Itziar - Deba (PR-GI 44)

 

Txangoa hasteko, Bilboranzko N-634 errepidearekiko paralelo dagoen ibilbidea hartuko dugu: hain zuzen ere, aintzinako udal hiltegi ondoan dagoen Maxpe etxe aurreko ibilbidea. 500 metro egin ondoren, Artzabal auzora helduko gara. Auzo horretan, Antzondo baserrirako errepidea hartuko dugu. Handik 100 metrora, aintzinako zentral elektrikoaren eskuineko errepidea, mendian goranzkoa, hartuko dugu. Laburra baina handia den aldapa igo eta gero, Istiña lepo barometrikora helduko gara. Handik, Deba ibaiko meandroaren bista bikainaz goza dezakegu. Aurrez aurre, Arno mendi-puska guztiz estaltzen duen kantauriar artez osatutako mantu iluna ikusiko dugu.

Eskuin aldean Istiña baserria geratuko zaigu eta, A-8 autobidepetik igaro eta gero, Goikoetxe baserriaren ondoan dagoen bide-kanalean sartuko gara; hain zuzen ere, 1920tik 60ko hamarkadara arte, Deba urez hornitzeko balio izan zuen bidean.

Arbil mendi magalaren ertzetik, haran idilikoaren atzealdea ikusiko dugu, eta bertan Arteaga (Artia) eta Sustraiaga (Sustraixa) baserriak ikus daitezke. Aurrerantz eginez gero, Lizarreta mendiaren hegalera helduko gara. Eskuin aldean, 100 metro inguru bidean behera eginez, Kortaberri baserria eta beherago Arrasketa ikusiko ditugu.

Ziurrenik, betizu-talde bat bazkan ikusteko aukera ere izango dugu, Lastur Haranerantz goazela.

Behin Lasturiko San Nikolas auzoan, geldiune bat egin, hamarretakoaz indarberritu eta, auzoa bisitatu dezakegu.

Errota atzean, ibai albo-alboan egon eta, Murgirantz doan bidea hartuz, ibilbidea egiten jarraituko dugu. Murgi baserri paretik igaroko gara, Murgizahar baserrira heldu arte. Behin hara helduta, (GI-3210) errepidea gurutzatuko dugu. Urritzu eta Andutzerako bidea alde batera utzi eta, eskuineko bidea hartuko dugu, gero Salsamendi mendi magalaren ertzetik ibiliko gara. Bide ertzean, "1888.urtea" inskribatua daukan haitz bat dago.

Geroago, bideak mendiaren aurkako isurialdera eramango gaitu; Ezteia baserrira heldu gara. Ezkerreranzko bidea hartuz gero, ekialdeko hegaletik ibiliko gara, lehenengo Salsamendi mendiaren hegaletik eta, gero Andutz mendiarenetik. Ikuspegia bikaina da eta, atzealdean Jaizkibel, Aiako Haitzak eta Larrun mendiak ikus daitezke.

Besteak beste, Irure baserria eta, Txoribilar ertzetik igaro eta gero, bideak Itziarko industrialdera eramango gaitu.

Itziarren beste geldiunetxo bat egin ondoren, Debarantz joango gara. Olloki baserrira helduta, eskuinerantz jarraituko dugu, Santa Katalinarantz, eta han GR 121 aurkituko dugu. Talaia paregabe horretatik, ikuspen onarekin, ia Matxitxakotik Landetarainoko kostaldea ikus daiteke.

Bistez gozatu ondoren, beherantz joango gara. Buenos Aires baserritik igaro eta, betiere itsaso gainetik, ibilbidea bukatuko dugu: Debako hondartza.

Deskargatu PR-GI 44