Gipuzkoa Zainduzek Debako adinekoen etorkizuneko egoitza martxan jartzeko lizitazioa abiatu du

2026ko abuztuaren 11a

Foru sozietateak deialdia ireki du adinekoentzako egoitza berriaren eraikuntza eta martxan jartzea bultzatuko duten proiektua eta bazkidea hautatzeko Urrats berri honek jarraipena ematen dio Debako Udalak uztailaren 23ko Osoko Bilkuran onartutako akordioari, eta Debaren etorkizunerako proiektu estrategikoetako batean aurrera egitea ahalbidetzen du

Debako adinekoentzako etorkizuneko egoitzaren proiektuak aurrera egiten jarraitzen du. Gipuzkoako Foru Aldundiak sustatutako Gipuzkoa Zainduz foru sozietateak ostiral honetan, abuztuaren 7an, argitaratu du proiektua eta bazkidea hautatzeko deialdia. Ondoren, bazkide horrekin sozietate misto bat eratuko da, adinekoentzako egoitza berriaren eraikuntza sustatzeko eta zerbitzua itunpeko erregimenean eskaintzeko.

Prozedura hau abian jartzeak beste urrats zehatz bat dakar etorkizuneko egoitzaren garapenean, eta jarraipena ematen dio Debako Udalak joan den uztailaren 23an hartutako akordioari. Osoko Bilkura hartan, Udalbatzak Gipuzkoa Zainduzekin lankidetza-akordioa onartu zuen. Akordio horren bidez, udal-lurra proiektuaren eskura jarriko da 75 urteko administrazio-emakida baten bidez.

Udalaren akordioaren ondoren, eta deialdia Gipuzkoako Aldizkari Ofizialean argitaratuta, interesa duten entitateek bi hilabeteko epea izango dute proposamenak aurkezteko. Aurkeztutako proposamenek beharrezko kaudimen teknikoa eta ekonomikoa egiaztatu beharko dute, eta pertsonengan zentratutako arreta-eredu berritzailea proposatu, Euskadiko Hirugarren Sektore Sozialeko erakunde batekin lankidetzan. Proiektuek, besteak beste, zentroaren eraikuntzarako aurreproiektua, gizarte-zerbitzuak eskaintzeko eredua, martxan jartzeko plangintza eta etorkizuneko ekipamenduaren kudeaketa jaso beharko dituzte. Bereziki hartuko dira kontuan asistentziaren kalitatea, bideragarritasuna, esperientzia eta berrikuntza, baita eskualdeko zaintza-sare publikoa indartzeko duten ekarpena ere.

Debaren eta Deba Kostaren beharrei erantzuten dien proiektua

Egoitza berriak Debako eta Deba Kosta osoko beharrei erantzutea du helburu, Gipuzkoako gizarte-zerbitzuen plangintzarekin bat etorriz. Udalak proiektuaren garapenean parte hartzen jarraituko du, eta Gipuzkoako Foru Aldundiarekin eta Gipuzkoa Zainduzekin koordinatuta lan egingo du, etorkizuneko zentroak udalerriaren eta eskualdearen beharrei behar bezala erantzun diezaien.

Debako alkate Alazne Txurrukak adierazi duenez, “Debako etorkizuneko egoitzaren proiektuak beste urrats garrantzitsu bat eman du. Udalak uztailean bere gain hartu zuen proiektua aurrera egin ahal izateko zegokion konpromisoa, eta orain Gipuzkoa Zainduzek proiektua eta hura aurrera eramango duen bazkidea hautatzeko prozedura abiatu du”.

Txurrukak azpimarratu du, halaber, “egoitza agintaldi honetako proiektu estrategikoetako bat dela, Debako eta eskualdeko herritarren benetako behar bati erantzutea baita helburua. Gure adinekoek kalitatezko zaintza, gertukoa eta beren beharretara egokitua jaso ahal izatea nahi dugu, eta horretarako ezinbestekoa da Gipuzkoako Foru Aldundiarekin elkarlanean jarraitzea”.

“Oraindik badugu bidea egiteko, baina akordioetatik eta plangintzatik proiektua aurrera eramatea ahalbidetzen duten urrats zehatzetara igarotzen ari gara”, amaitu du alkateak.