13 eskaera jaso dira 2026ko etxebizitza alokairurako dirulaguntzetan Deban

2026ko ekainaren 30a

Eskaera kopuruak etxebizitzarako sarbidearen arloko laguntzek duten garrantzia eta herritarren erantzun sendoa berresten ditu.

Etxebizitza alokairurako dirulaguntzen eskaera-epea amaituta, Debako Udalak jakinarazi du guztira 13 eskaera jaso direla deialdi honetan. Jasotako eskaerek agerian uzten dute deialdiko neurrien aldaketek laguntzak eskuratzeko baldintzak zabaldu dituztela eta herritarren interesa eta beharra islatzen dutela. Horren harira, aurten hainbat eguneraketa egin dira laguntzak errealitate sozial eta ekonomikora hobeto egokitzeko: diru-sarreren mugak handitu dira, dirulaguntzen ehunekoak eguneratu dira, adin-muga ezabatu da eta gutxieneko erroldatze-epea urtebetera murriztu da.

Deialdi honen helburua da etxebizitza alokairurako sarbidea erraztea eta pertsona zein familien ekonomian alokairuak duen eragina arintzea.

Debako alkateak azpimarratu du jasotako erantzunak argi erakusten duela etxebizitzaren arazoak oraindik ere lehentasunezko erronka direla udalerrian. “Jasotako eskaerek erakusten dute etxebizitzarako laguntzek eginkizun garrantzitsua dutela herritarren egunerokoan. Horrenbestez, Udaletik lanean jarraituko dugu laguntza hauek behar sozialari erantzun egokia emateko”, adierazi du Alazne Txurruka alkateak.