2022ko Ordenantza Fiskalak onartu ditu udalbatzak aho batez

2021/10/01
Atzo, irailak 30, egin zuen Debako udalbatzak ohiko osoko bilkura. Garai honetan ohikoa denez, 2022ko ordenantza fiskalen gaia landu zen. Itziar Irizar alkateordeak eta Ogasun zinegotziak bilkuran adierazi zuenez, Ogasun batzordean landu eta adostu ondoren eraman dute gaia osoko bilkurara.

Iaz eguneraketa inportantea egin zitzaien ordenantza fiskalei, urte luzez aldaketarik egin gabe egon ondoren. Aurten urrats bat gehiago egin da, eta aurrera begirako irizpidea markatu. Honela, urtez urte egingo da eguneraketa, bat-batean igoera esanguratsurik egin behar ez izateko. Urtero KPIaren araberako igoera aplikatzeko irizpidea adostu da, hori positiboa denean. Negatiboa denean, berriz, izoztu egingo dira. Aurtengo igoera %1ekoa izango da.

Hondakinen bilketaren kasuan %1,57koa izango da, igoera Mankomunitateak aurreikusitakoaren araberako igoera aplikatzen baita. 

TAOaren tasei dagokienez, datorren astean hasiko da Udala horri dagokion Ordenantza lantzen. 

Gai zerrendan zeuden gainontzeko gaiak ere aho batez onartu ziren, bi mozioak izan ezik. Esaterako, etxebizitzaren alokairurako dirulaguntzen oinarriak onartu ziren. Etxebizitza tasatuei lotutako bi gai ere onartu ziren: Etxebizitza tasatuen udal ordenantzaren aldaketa onartzea, eta Elizburuko etxebizitza tasatuen zozketarako oinarriak. 2022. urterako taxien tarifak ere onartu zituen udalbatzak. 

Bestetik, indarkeriaren biktima diren emakumeak hartzeko eta gizarte larrialdietarako egoerak artatzeko Elgoibarren dagoen etxebizitza erabiltzeko Debabarrena eskualdeko udalen arteko lankidetza-hitzarmena onartu zen, hau ere aho batez. 

'Deskonektatu elektriketatik' adierazpen instituzionala onartu zen. EH Bilduk (6 bozka) alde bozkatu zuen, Debarren Ahotsaren (4 bozka) abstenitu egin zen eta EAJ-PNVk (3 bozka) kontra bozkatu zuen.

EAJ-PNVk urgentziaz sartu zuen “Kultura Batzordeko lehendakaria gaitzestea, aipatutako batzordean ordezkaritza-gehiengoak erabakitakoa ez betetzeagatik, eta aldebakarreko jarduera baimentzeagatik, Batzordearen jarrera kontuan hartu gabe” mozioa ere onartu zen, EAJ-PNVren (3) eta DAren (4) aldeko bozkekin eta EH Bilduren (6) kontrako bozkekin. 

 

'Deskonektatu elektriketatik' adierazpen instituzionala 

Kultura Batzordeko lehendakaria gaitzesteko mozioa