Aho batez onartu da Udalaren eta Itziarko auzo udalaren eskumen-araubidea arautzen duen hitzarmena

2020/12/18
Debako udalaren eta Itziarko auzo udalaren arteko eskumen-araubidea arautzen duen administrazio-hitzarmenari lehen onarpena eman dio Debako udalbatzak, aho batez, hilaren 17an egindako osoko bilkuran, joan den asteazkenean Itziarko Auzo Udalak egin zuen bezalaxe.

Modu honetan, bi erakundeen arteko lankidetza eta bakoitzari dagozkion eskumenak zehazten dira. Gaur, abenduak 18 sinatu dute bi aldeek hitzarmena Itziarren egin den ekitaldian. 

Ohiko osoko bilkuran landutako gaiak aho batez onartu dira aurkeztutako bi mozioak izan ezik. EH Bilduren (6) eta Debarren Ahotsaren(4) aldeko botoekin onartu da Eusko Jaurlaritzari udalentzako ezohiko funtsa berezi gehigarria eskatzeko mozioa. EAJ-PNVk kontra bozkatu du.

Honen bitartez, Eusko Jaurlaritzari EAEko udalentzat ez -ohiko diru funtsa berezi bat sortzea eskatzen dio Debako udalak, udalek COVID-19aren krisiaren ondorioz jasan behar dituzten hainbat gasturi aurre egiteko: hala nola, zerbitzuak egokitzea, larrialdian dauden herritarrak laguntzea, arrakala digitala gutxitzea, haurren elikadura bermatzea... Europatik datozen funtsen %30 udaletara bideratu dadin bermatzea ere eskatzen da. 

2020 urteko Enplegua eta Tokiko Garapena Sustatzeko Proiektuak, Lanbide - Euskal Enplegu Zerbitzuak diruz laguntzen dituenak gauzatzeko Elgoibarko, Soraluzeko, Mendaroko, Debako eta Mutrikuko Udalen artean burutzen den gestioa Debabarreneko lurralde eremuaren esku uzteko hitzarmena sinatzea aho batez onartu da. 

Aho batez onartu da, halaber, 2019ko lankidetza hitzarmen baten data atzeratzea. Berdinak gara elkarteak Guatemalan COVID-19ak eta uholdeek eragindako kalteen ondorioz, ezin izan du 2019an emandako diruarekin aurreikusitako proiektua gauzatu eta lan horiek amaitzeko epea luzatzea onartu da

Gai zerrendan aurreikusita ez zegoen eta Sarek erregistratutako mozioa ere aztertu du udalbatzak. Euskal preso eta iheslariek bizi duten egoera salatzeko urtarrilaren 9an egingo diren mobilizazioetan parte hartzeko deia egiten da bertan. Debako udalak konpromisoa hartu du herrian egingo den mobilizaziorako deialdia sustatzeko. EH Bilduren eta EAJ-PNVren aldeko botoekin onartu da. Debarren Ahotsak kontra bozkatu du. 

MOZIOA: EUSKO JAURLARITZARI ESKAERA. UDALENTZAT EZ-OHIKO DIRU FUNTSA

MOZIOA: SARE