Amaia Zinkunegi eta Rafa Bravo, Debako IV. literatur lehiaketako irabazleak

2018ko otsailaren 20aAmaia Zinkunegi eta Rafa Bravo, Debako IV. literatur lehiaketako irabazleak

Hilaren 16an egin zen "Deba 100 hitzetan" IV. literatur lehiaketako sari banaketa. Aurtengo sariak herrian bertan gelditu dira; Amaia Zinkunegi eta Rafa Bravo izan baitira sariketako bi irabazleak.

Pasa den ostiralean egin zen Deba 100 hitzetan IV. literatur lehiaketako sari banaketa, Agirre jauregiko ispiluen gelan. Ekitaldira bertaratu ziren, besteak beste, Ane Egidazu Debako Udaleko kultur zinegotzia, euskara zein gaztelerazko epaimahaikideak, musika eta dantza eskolako ikasleak eta, nola ez, edizio honetako irabazleak.

Izenak berak dioen bezalaxe, lehiaketa honetara aurkezten diren lanek ezin izaten dute Deba 100 hitz baino gehiagotan deskribatu. Aurtengoan gai konkretu baten inguruan idatzi behar izan dute parte hartzaileek; izan ere, entregatu beharreko lanek Deba eta Mutriku arteko zubiarekin izan behar zuten zerikusia. Guztira 58 lan aurkeztu ziren urrian, 19 euskaraz eta beste 39 gazteleraz.

Horietatik lau izan dira sarituak; bi euskarazko modalitatean, eta beste bi gaztelerazkoan.

Sarituak

Euskaraz:

  • Lehen saritua, 500 €: Zubi zaharreko pirata. Amaia Zinkunegi (Deba)

  • Bigarren saritua, 200 €: Amonak eskutik heldu eta... Ainara Elizondo (Hondarribia)

Gazteleraz:

  • Lehen saritua, 500 €: Duelo en el puente. Rafa Bravo (Deba)

  • Bigarren saritua, 200 €: Crónica del puente. Rafa Bravo (Deba)

Aurkeztu diren lan guztiak Debako Udalaren eta Cardenas Fundazioaren eskuetan geldituko dira, baita hauen erreprodukzio eta hedapen eskubideak ere.