Animadeba Nazioarteko Animazio Zinemaldiaren lehen edizioa ospatuko da Deban ekainaren 19tik 23ra

2019ko otsailaren 5aAnimadeba Nazioarteko Animazio Zinemaldiaren lehen edizioa ospatuko da Deban ekainaren 19tik 23ra

Ekitaldiak nazioarteko film laburrak sarituko ditu oraingoan; eta lanak aurkezteko epea zabalik egongo da 2019ko martxoaren 22ra arte.

Ekainaren 19tik 23ra bitartean Animadeba Nazioarteko Animazio Zinemaldiaren lehen edizioa ospatuko dugu Deban. Ekitaldiak nazioarteko animaziozko film laburrik onenak sarituko ditu, eta bi kategoriatan banatuta egongo da lehiaketa: sail ofiziala, batetik; eta zuzendari gazteen saila, bestetik.

Nazioarteko lehen lehiaketa honek azken hamaika urtetan abenduan egin izan den Animadeba Debako Animazio Zinemaldia (Euskal Herriko animazio mostrarik zaharrena) ordezkatuko du. Izan ere, ekitaldiaren antolatzaileek iaz egindako hausnarketan ikusi zuten Animadebaren 10. edizioaren ondoren, hasiera-hasieratik bultzatu izan den formatua (hau da, animaziozko gortina lehiaketa eta hainbat film labur eta luzemetraien proiekzioa) bukatuta zegoela.

Gauzak horrela, Udalak bi aukera baino ez zituen: mostrarekin amaitu, edo aurrerapausu bat eman eta nazioarteko zinemaldi bihurtu. Azkenik, bigarrenaren alde egin du apustu.

Edizio honetako lehiaketa nazioarteko animaziozko film laburrei zuzenduta dago, eta atzo argitaratu zituzten www.animadeba.com webgunean sariketaren oinarriak. Izen-emate epea zabalik dago jada, eta hala jarraituko du 2019ko martxoaren 22ra arte. Interesatuek FilmFreeway plataforma digitalean bete beharko dute eskaera inprimakia.

Informazio gehiago nahi izanez gero, idatzi helbide honetara: info@animadeba.com.