Apirilaren 13 bitartean eman daiteke izena Emakumea* Surflari ikastaroetan

2023ko apirilaren 3a

Emakumea* Surflari emakumeen artean surfa sustatzearen alde lanean ari den irabazi asmorik gabeko elkartea da, eta euskal kostaldeko herrietan emakumeei soilik zuzendutako ikastaroak antolatzen ditu 2014az geroztik. Aurten ere, Debako Udalak eta Emakumea* Surflari elkarteak lankidetza hitzarmena adostu dute 16 urtetik gorako emakumeei* zuzendutako ikastaroak sustatu eta pertsona hauen ahalduntze indibidual eta kolektiboa bultzatzeko asmoz.

Udaberriko surf ikastaroak apirilaren 19tik maiatzaren 27ra bitartean izango dira (6 saio). Lehenengo aldiz, berrikuntza modura, 5 eta 6 mailetako ikastaroak eskainiko dira. Begiraleak bideo bidez egindako grabaketak baliatu ahal izango ditu partaide bakoitzak norbere hausnarketa egin eta teknikan hobetzeko. Bestalde, udaberriko saio hauetan ez da 3 eta 4 mailetako talderik egongo, Zarautzen izango da horretarako aukera (informazio gehiago www.emakumeasurflari.eus webgunean).

Lehenengo eta bigarren mailak asteazken eta ostiraletan, 17:00etatik 19:00etara; eta 5 eta 6. mailak larunbatetan, 10:00etatik 13:00etara izango dituzte euren saioak, 6 laguneko taldeetan. Prezioa, asegurua barne, 113 €takoa da.

Emakumea* Surflari elkarteak ONSIDE funtsetako diru-laguntza jaso du. Kirolean genero berdintasuna sustatzen duten elkarteei bigarrenez emango zaien mundu mailako laguntza da. Modu horretan, langabezian dauden, 60 urtetik gora dituzten edo egoera zaurgarrian dauden pertsonek beherapena izango dute ikastaroaren kuotan. 

Ikastaroan parte hartu nahi dutenek apirilaren 3tik 13ra bitartean eman beharko dute izena, dagokion kuotaren ordainketaren ziurtagiria eta izen-emate orria (webgunean, harrera bulegoan eta turismo bulegoan eskura daiteke) Turismo Bulegoan entregatuta (943 19 24 52 · turismoa@deba.eus). Taldeak osatzeko izen-ematearen ordena errespetatuko da.

IZEN EMATE ORRIA eta MAILA AUKERAKETA