Arrakastaz amaitu dira Iberdrolako transformadorearen leku-aldatze lanak, arazo historiko bati amaiera emanez

2025ko azaroaren 26a

Hiru hamarkada baino gehiagoren ostean, Debako Udalak amaiera eman dio marea bizietan etengabeak izaten ziren argindar-etenek sortutako arazoari, eta 580 abonatu baino gehiagori horniketa bermatu die. i-DEk eginiko jarduketak ez du kosturik suposatu Udalarentzat, eta bi erakundeen arteko lankidetza estuari esker izan da posible. Proiektuak horniketa-kalitatea hobetzea eta etorkizuneko beharrak asetzea ahalbidetzen du, zerbitzu sendo eta iraunkorra eskaintzen delarik.

Debako Udalak eta Iberdrolaren i-DE banatzaileak amaitu dituzte Gudarien Plazako transformadore elektrikoa geltoki zaharraren ondoan dagoen aparkalekura lekuz aldatzeko lanak. Jarduera honek marea bizietan hornidura elektrikoari eragiten zion arazo historiko bati amaiera ematen dio.  Horrela, 580 erabiltzaile baino gehiago izango dira onuradun.

Herriko zerbitzuaren segurtasun eta kalitatearako proiektu estrategiko bat da hau. Leku berriak uholdeetatik babesa bermatzen du eta sare elektrikoaren fidagarritasuna indartzen du, teknologia moderno eta digitalizatuena erabiliz. Horrekin, hiru hamarkada baino gehiagoz konponbiderik gabe egon den herritarren eskaerari erantzuten zaio.

Proiektu hau Debako Udalaren eta i-DEren arteko lankidetza estuari esker gauzatu da. Gainera, nabarmendu behar da Iberdrolak obraren kostu osoa bere gain hartu duela, Udalak berak inolako gasturik izan gabe. Obra egin bitartean, mugikortasunean eta garraio publikoan ahalik eta inpaktu txikiena izateko neurriak hartu dira, funtsezko zerbitzuen jarraitutasuna ziurtatuz.

Debako alkate Alazne Txurrukak honela adierazi du: “lorpen honek erakusten du zein garrantzitsua den sektore publiko eta pribatuaren arteko lankidetza herritarren ongizatea hobetzeko. Hiru hamarkada baino gehiagoko itxaropenaren ondoren, azkenean argindar-horniduran eragina zuten arazo historiko bati irtenbidea ematea lortu dugu, batez ere marea biziak direnean. Transformadorea lekuz aldatze honekin, Debak ez du soilik sare seguruago eta fidagarriago baten onura jasoko, baizik eta 580 abonatu baino gehiagorentzako zerbitzu sendoagoa ere bermatuko dugu, konponbide bat behar zutenentzat. Bestalde, Gipuzkoako Iberdrolako Banaketa arduradun Iker Urrutiak azpimarratu du: “Udalaren inplikazioari eta i-DEren administrazio honekin eta beste batzuekin duen hurbiltasunari esker, arazo errepikakorra konpondu dugu eta gure bezeroei zerbitzu hoberena eskaintzea lortu dugu. Gure lehentasuna horniketa seguru eta eraginkorra eskaintzea da, eta jarduketa honekin sare elektrikoa sendotu eta Debaren garapenean laguntzen dugu.”