Aurtengo Gure Balioak Saria urriaren 23an emango da ezagutzera Deban

2013ko urriaren 14aAurtengo Gure Balioak Saria urriaren 23an emango da ezagutzera Deban

Gure Balioak Saria gure eskualdean gizarte balioen arloan nabarmendu den pertsona edo entitatea aitortzea eta saritzea du helburu. Sariak IV. edizioa beteko du aurten. Debegesa, eskualdeko Garapen Agentzia da Sari honen sustatzaile eta kudeatzaile nagusia; Debako Udala eta DanobatGroup taldea dira aurtengo laguntzaileak. Saria banatzeko ekitaldia urriaren 23an egingo da, Debako Agirre Jauregiko Ispiluen Gelan, 18:30etik aurrera.

Gure Balioak Sariak laugarren edizioa beteko du aurten. Epaimahaiak hartua du dagoeneko erabakia eta saridunaren izena datorren urriaren 23an emango da ezagutzera. Gure Balioak Sariak Debabarreneko eskualdean gizarte-balioen arloan egindako lanagatik eredugarri den pertsona edo erakundea nabarmentzea eta saritzea du helburu.

Sari-emate ekitaldia Debako Agirre Jauregiko Ispiluen Gelan egingo da, arratsaldeko 18:30etik aurrera, Debegesa Garapen Agentziak antolatuta, Debako Udalaren eta DanobatGroup taldearen laguntzarekin.

Ekitaldia irekia izango da eta herritarrek bertan parte hartzeko aukera izango dute. Aldez aurretik izena ematea ezinbestekoa da 943 820 110 telefonora deituz (Silvia Gil) edo balioak@debegesa.com helbidera idatziz.

Ekitaldiaren baitan, iaz zendu zen Txema Cornago eibartarrari omenaldia egingo zaio. Hasieratik Gure Balioak ekimeneko kide zen Cornago, Eibarko Hezkuntza Esparruko Egoitzako Zuzendaria eta Antzerki Jardunaldien bultzatzaile nagusia.

Bestalde, Jon Leonardo Aurtenetxe, Deustuko Unibertsitateko Soziologia katedradunak hitzaldia emango du, “Balioak: Krisiari aurre egiteko baliabideak” izenburupean.

Halaber, Teresa Albero (@teresa_albero) sopranoak kantaldia eskainiko du. Albero Valentziako Goi Mailako Musika Kontserbatorioan lizentziatua da eta hainbat opera egin ditu soprano liriko gisa. Nazioarte mailan, errezitaldi ugari eskaini ditu Frantzian eta Donostiako Nazioarteko Musika Hamabostaldian (2012) kritika espezializatuaren goraipamenarekin.

Aurreko urteetako saridunak

2010ean, lehendabiziko edizioan, Mª Tere Ganchegui eibartarrak eskuratu zuen errekonozimendua, gizarte balioen arloan egindako ibilbide mardulagatik; 2011an, Gemma Agirregomezkorta elgoibartarrari eman zitzaion Gure Balioak Saria, laguntza sozialaren alorrean egindako lan eskuzabal eta handiarengatik. Iaz, 2012an, Jesus Bilbaok jaso zuen saria, enpresa alorrean batik bat egindako lana eta ekarpena goraipatuz.

Debegesa Garapen Agentzia lantzen ari den Gure Balioak proiektuaren baitan kokatu behar dugu sari hau. Proiektu honek eskualdearen garapen iraunkorra lortzeko beharrezko diren gizarte balioak sustatzea du helburu nagusi.

Saria, Juan Luis Baroja Collet eskultoreak egindako artelana

Gure Balioak sariaren irabazleak Juan Luis Baroja Collet (Le Creusot, Frantzia. 1957) artistaren eskultura jasoko du. Entzute handiko artista, Baroja Collet Debako Eskulangintzarako Irakaskuntza Zentroko grabaketa kalkografikoaren gelako arduraduna da.

Artelanak “Balioen artikulazioa” du izenburu eta brontzezko eskultura bat da.