Behar handiena duten haurrei laguntzeko sarea sortzeko deialdia egingo du udalak

2020/06/04
Bizitzen ari garen pandemia egoerak are ageriago utzi ditu jada egoera zaurgarrian bizi ziren herritarren gabezia eta beharrak. Hori aintzat hartuta, ekimen desberdinak bideratu dira hilabeteotan eta aurrera begira ere lanean ari da udala ildo horretan.

Egoera zaurgarrian zeuden familietako haurrak dira, aipatu egoeran dauden kolektiboetako bat. Hauei laguntzeko asmoz, hezkuntza-zaintza sarea antolatzeko ideia lantzen ari dira Debako udaleko gizarte zerbitzuen saila, herriko ikastetxe, Gaztelekua eta aisialdi taldearekin elkarlanean. Buruan duten ideia da behar gehien duten haurrei, laguntza-ordu batzuk eskaintzea, etxeko lanak egiteko, euskarazko mintza-praktika egiteko…

Boluntarioekin osatu nahi da sarea eta horretarako, hezkuntzako irakasleei eta irakasle ohiei bilerarako deia luzatu nahi zaie. Ideia partekatu eta proiektuaren bideragarritasuna aztertzeko. Ekainaren 9an izango da, 17:00etan udaletxeko bilera-gelan (2. solairuan).