Berdintasun plana herritarren ekarpenekin osatzeko deia egin du Debako Udalak

2019ko azaroaren 25aBerdintasun plana herritarren ekarpenekin osatzeko deia egin du Debako Udalak

Debako Udala, Emakunderen babesarekin, emakume eta gizonen arteko I. berdintasun plana ebaluatzen eta II. berdintasun plana egiten ari da. Une honetan, herritarrei ekarpenak egin ditzaten proposamena luzatu nahi die.

Prozesua hori aurrera eraman ahal izateko, Daiteke aholkularitzako teknikariak informazio bilketa egiten ari dira. Emaitza eraginkor eta errealak ateratzeko, datuak jasotzeaz gain, ezinbestekoa da herriko eragile guztien parte hartzea (udaleko langileak, politikariak, herriko elkarte zein erakundeak eta herritarrak).

Orain arte, udal langile eta politikarien ikuspegia eta iritzia jaso dute. Hurrengo pausoa, herritarren ekarpenak jasotzea izango da. Horretarako, galdetegia erantzutera gonbidatzen ditu udalak herritar guztiak, abenduaren 3a aurretik. 

“Emakume eta gizonen arteko berdintasuna, denon artean eraiki beharreko gaia da, beraz Udaletik gonbidatu nahi zaituztegu prozesu honetan parte hartzera guztion ekarpenak beharrezkoak eta interesgarriak direlako. Eta elkarrekin lan egiten bakarrik, lortuko dugu etorkizuneko Deba eraikitzea, berdintasunean oinarrituta egongo dena”, Itziar Irizar alkate orde eta politika feministetako zinegotziaren esanetan. 



* Galdetegia: https://sites.google.com/daiteke.com/debanberdin