Ohiko osoko bilkura egin du Debako udalbatzak

2022ko uztailaren 22aOhiko osoko bilkura egin du Debako udalbatzak

Udako etenaren aurreko azken osoko bilkura egin zuen atzo, uztailak 21, Debako udalbatzak. Aho batez onartu zen EAEko Administrazio Orokorraren esku jartzea Itziarko Udaletxe zaharreko eraikinaren birgaitzea (Luzaro HLHI). San Roke jaietako egitaraua ere berretsi zen.

Itziarren eskola berria egiteko proiektuari lotutako tramitea da hori. Ekaineko osoko bilkuran udalbatzak onartu zuen Eusko Jaurlaritzaren Hezkuntza Sailari Itziarko haurrek lehen hezkuntza 6. mailara arte bertan egiteko eskaera egitea. Aurten LH2n dauden ikasleek LH6 arte Itziarren bertan ikas dezaten, eskola berrian. 

2022ko San Roke jaietarako Kultura Batzordeak prestatu duen egitaraua udalbatzak berres zezan aurkeztu zen bileran. Aldeko 10 bozkarekin (EH Bilduren 6 eta Debarren Ahotsaren 4) eta 3 abstentziorekin (EAJ-PNV) berretsi zen. Datozen egunetan banatuko da etxeetara jaietako egitaraua. 

Batzarraren bideoa ikusgai dago Udalaren Youtube kanalean.