Deba eta debarren ongizatea zein etorkizuna oinarri eta ardatz dituen 2023-2027 Gobernu Plana aurkeztu du udal gobernuak

2024ko maiatzaren 21a

Debar orori egokitutako herria eraikitzea, tokiko ekonomia-ehuna indartzea eta kalitatezko enplegua sortzea, mugikortasuna eta irisgarritasuna hobetzea, ingurumen jasangarritasuna indartzea, auzoak babestu eta landa garapena bultzatzea, kultura eta euskararen erabilera sustatzea eta udal hurbil eta gertukoagoa eskaintzea dira, besteak beste, Gobernu Planak jasotzen dituen helburu estrategiko nagusiak. Datozen egunotan Debako etxe guztietan banatuko da Gobernu Plana; horren ondotik, eta gardentasun zein gertutasun printzipioei helduta, Gobernu Planaren inguruan argibideren bat gehiago jaso nahi duten herritarrek aurrez-aurreko hitzordua eskatu dezakete udal gobernuko kideekin.

Debako udal gobernuak atzo arratsaldean aurkeztu zuen 2023-2027 Gobernu Plana. Alazne Txurruka alkateak adierazi duenez, “plan hau etorkizunerako promesa edo hitzematea da, modu ordenatuan lan egiteko eta egungo beharrei zein etorkizuneko erronkei modu egoki zein eraginkorrean erantzuten lagunduko digun bide-orria”.

EAJ-PNVren eta Orain Debaren hauteskunde programetan jasotakoa uztartu eta bateratuta landu du udal gobernuak programa, debarren beharrak aintzat hartuta eta betiere herriaren eta herritarren onura eta etorkizuna bermatzea ardatz eta oinarri hartuta. Hala, legealdi honetarako udal gobernuak dituen konpromiso eta proiektuak jasotzen ditu Gobernu Planak, datozen urteotan Deba indartzen, hobetzen eta hazten jarraitzeko.

Hori lortze bidean, hainbat helburu eta proiektu estrategiko jaso ditu dokumentuan. “Deba zein debarren ongizatea eta etorkizuna dira gure jardunaren jomuga eta helburu nagusia eta hori lortze aldera lanean gabiltza, lehen egunetik”, adierazi du alkateak.

6 ardatz eta 43 ekintza eta proiektu estrategiko jasotzen dituen Gobernu Plana

Aurkezpen-ekitaldian gobernu-taldeko kide guztiek hartu dute parte eta banaka azaldu dituzte 2023-2027 Gobernu Planak jasotzen dituen ardatz, helburu, proiektu eta ekintza estrategiko guztiak.

Udalerria pertsonentzat: Ardatz honen helburua da debar orori egokitutako herria eraikitzea, debar guztien beharrak aintzat hartu eta horiei erantzuna emango dien herria eraikitzea, alegia. Ekintza eta proiektu zehatzak biltzen ditu, hala nola "Zaintza Ekosistema", -adinekoentzako arreta-baliabideak hobetzeko-, edota zahartze aktiboa sustatzeko eta Deba berdinzaleagoa bilakatzeko estrategiak ere.

Aukerak eskaintzen dituen herria: Ardatz estrategiko honen baitan jasotzen dira tokiko ehun ekonomikoa indartzeko eta kalitatezko enplegua sortzeko ekimenak. Horien artean nabarmenenak dira: tokiko merkataritza eta ostalaritza dinamizatzeko Plana, Itziar-Debako enpresa parkearekin elkarlana, -industria gunea biziberritzeko-, edota turismo alorra, Deba berriro dagokion lekuak kokatu eta turismoan erreferente bilakatzeko.

Irisgarria, jasangarria eta segurua: Debako Irisgarritasun Plana, argiteria publikoaren hobekuntza eta tokiko energia-komunitateen sorrera jasotzen ditu, besteak beste, ardatz honek. Era berean, Gudari plaza oinezkoentzat jartzea eta pasealeku estalia eraldatzea ere sartzen dira, biak ere 2024aren amaierarako aurreikusita daudenak.

Auzoak: Arreta berezia eskainiko zaie hirigunea inguratzen duten auzoei. Horrez gain, Itziarko auzo-udalarekin proiektu estrategikoetan lankidetzan aritzea, Itziarko eskola berriaren berrikuntza eta auzoetako jaiak sustatzea eta landa-ingurunearen garapenari laguntzea dira ardatz honek jasotzen dituen ekintza estrategikoetako batzuk.

Kultura eta gure nortasuna: Adin guztientzako kultura-jarduerak sustatzea, kultur eta kirol-ekipamenduak hobetzea, eta euskararen erabilera areagotzea dira ardatz honetarako ekintza eta proiektu nagusiak. Gainera, laster aurkeztuko den Euskararen Erabilera Normalizatzeko Plan Estrategikoa amaitzen ari da.

Udal hurbila eta arduratsua: Debarren ahotsa entzunez eta komunikazio-bideak irekiz herritarren eta erakundearen arteko distantzia hori hautsi eta hurbiltasuna eskaintzea da ardatz estrategiko honen helburu nagusia. Udalaren webgunea modernizatuko da, administrazio digitala martxan jarriko da eta aurrekontu parte-hartzaileak sustatuko dira herritarren inplikazioa sustatzeko.

“Ekintza eta proiektu horiekin guztiekin gure helburua da Deba bizitzeko udalerririk onena izatea, eta etengabe egingo dugu lan, gogoz, ilusioz eta erantzukizunez, emandako hitza bete eta hori errealitate bilaka dadin”, adierazi du Debako alkateak, Alazne Txurrukak.

Datozen egunotan, Gobernu Plana Debako etxe guztietan banatuko da, herritarrek bertatik bertara ezagutu ditzaten udal gobernuak bere gain hartutako ekimenak eta konpromisoak. Horren ondotik, alkateak adierazi du udal gobernuak gogoz artatuko dituela Gobernu Planaren inguruan gehiago jakiteko interesa duten herritarrak, horretarako aurretiazko hitzordua eskatuz.

Ikus gobernu plan osoa hemen