Deba eta Mutriku lotzen dituen zubiaren lanak hasiko dira

2020/04/28
Bi herrietako herritarrek aspaldi espero zuten albiste bat emateko moduan egongo gara laster. Izan ere, gure bi herriak lotzen dituen zubiaren konpontze lanak abiatzeko azken tramite administratiboak abiatu dira.

Gipuzkoako Foru Aldundiak bideratu digu bi udalei obra egiteko hitzarmen proposamena eta bi udalok, ostegunean, hilaren 30ean egingo ditugun osoko bilkura banatan landu eta onartuko dugu. 

Elkar-bizitzeko garrantzitsua izan da zubi hori Mutriku eta Debako herritarrentzat, izan ere, asko dira zubiaren alde batean bizi, baina egunerokoan ibaiaren beste aldera jotzen dutenak. Udaletan lankidetza hitzarmenak onartuta, Gipuzkoako Foru Aldundiaren esku egongo da obren lizitazioa. 

Monumentu-multzo izendapena duen zubiaren zutoin bat hautsi eta zati bat erori egin zen 2018ko uztailaren 5ean. Ordutik, zaildu egin da bi herrien arteko komunikazioa eta bi herrietarako herritarrak gogaitu egin ditu gaiak, sortu zaizkien zailtasunengatik. 

Bizitzen ari garen osasun alarma egoera honetan, gure herritarrentzat garrantzitsua den azpiegitura hau azkenean konpontze bidean jarriko dela, albiste ona da.