DEBA, Madrilgo FITUR Nazioarteko Turismo Azokan

2016ko urtarrilaren 23aDEBA, Madrilgo FITUR Nazioarteko Turismo Azokan

FITUR Nazioarteko Turismo feriaren ateak asteazkenean zabaldu ziren, Madrilen, eta beste urte batez Deba bertan izango da, bisitariei gure herriaren erakargarritasunen berri emateko. Euskadiko standaren barruan, Euskal Kostaldearen erakusmahaian, bisitariek izango dute Deba ezagutzeko aukera.

Asteazkenanean, 17:00etan, Euskadiko standean Euskal Kostaldeko Geoparkearen aurkezpena egin zen, berriki UNESCOren Munduko Geoparke izendatua. Deba, Mutriku eta Zumaiako herriek osatzen dute Geoparkea eta aparteko ondare geologiko, natural eta kulturala gordetzen du, Euskadin daukagun proposamen erakargarrienetakoa osatuz.

Ekitaldian izan ziren Basquetour eta Geoparkea osatzen duten hiru herrietako ordezkariak, alkateak buru zirelarik, Jose Angel Lizardi, Mutrikuko alkatea, Pedro Bengoetxea, Debako alkatea eta Oier Korta, Zumaiako alkatea izan ziren eta haiekin batera Debabarrena eta Urola Kosta eskualdeetako ordezkariak. 

Ostegun goizean berriz, Beatriz Escobar lankideak, Debegesa garapen agentziako lehiakortasun turistikorako Teknikariak, “2015eko SICTED kudeatzaile onena” kategorian bigarren finalista saria jaso zuen, Debabarreneko enpresa turistikoetan SICTED programa garatu eta ezartzean kalitatearen alde egindako lana eta ahalegina aitortuz.

SICTED Turismo Kalitatearen Sistema Integralak helmuga turistikoen kalitatea hobetzea du helburu, eta horrekin batera turismo instalazioen kudeaketa hobetzea, sektorearen profesionaltasun handiagoa eta bisitariaren esperientzia eta asebetetzea hobetzea.

Debabarrena eskualdeak 2010ean egin zuen bat SICTED programarekin, Basquetourren eskutik, eta gaur egun eskualdeko 37 enpresa turistikok dute Kalitate Turistikoaren Konpromisoa ziurtagiria, eta hauetatik 18 Debakoak dira.

Debegesa garapen agentziak, Basquetourrekin elkarlanean, SICTED programan parte hartzen duten enpresa eta zerbitzu turistikoei honako zerbitzuak eskaintzen dizkie: formazio planak, asistentzia teknikorako bisitak, taldekako tailerrak, hobekuntza planak aurrera eramanteko lan taldeak eta kalitate-arauen egokitasuna kontrastatzeko enpresen ebaluazioak, besteak beste. Etengabeko formazio eta jarraipen prozesu hau guztia burututakoan, Kalitate Turistikoaren Konpromisoa ziurtagiria ematen zaie parte hartu duten establezimenduei.

Eskualdeko edozein enpresak programa honetan parte hartu nahi izanez gero, Debegesarekin jar daiteke harremanetan:  helbidera idatziz edo 943 81 01 10 telefono zenbakira deituz (Beatriz Escobar).