Debak bat egiten du Emakumearen Nazioarteko Egunarekin, genero-berdintasunarekiko konpromisoa berretsiz

2025ko otsailaren 25a

Debako Udalak, herriko talde eta elkarteekin elkarlanean, hainbat ekintza antolatu ditu, horien artean "Amatasunak Feminismotik. Zaintzen inpaktua emakumeen bizitzetan" hitzaldia, emakumezkoen pala txapelketa zein bazkaria eta Querer telesailaren proiekzioa.

Martxoaren 8an, larunbata, Emakumearen Nazioarteko Eguna ospatuko da, eta horren harira, Debako Udalak eta herriko hainbat talde eta elkartek hainbat ekintza antolatu dituzte genero-berdintasunaren aldeko borroka ikusarazteko eta udalerriak emakumeen eskubideekiko duen konpromisoa indartzeko.

Hala, ekintza egitaraua martxoaren 5ean hasiko da, 18:00etan, Ispiluen Gelan, Parean Elkarteak antolatutako Amatasunak Feminismotik. Zaintzen inpaktua emakumeen bizitzetan hitzaldiarekin. Hitzaldi hau euskaraz izango da, eta amatasunak ikuspegi feministatik duen eraginari buruzko hausnarketa eskainiko du.

Martxoaren 8an, Emakumearen Nazioarteko Egunean, hainbat ekitaldi egingo dira. Lehenik eta behin, 10:30ean, Aldats pilotalekuan, emakumezkoen pala txapelketa ospatuko da, Gaztelekuak antolatuta. Txapelketa ostean, halaber, bazkaria egingo da. Era berean, 12:00etan, elkarretaratzea egingo da Foruen plazan eta genero berdintasunaren aldeko adierazpen instituzionala irakurriko da.

Programak kultur proposamen batekin jarraituko du: martxoaren 18an eta 19an, 18:00etan, Querer telesaila proiektatuko da Kultur Elkartean. Martxoaren 18an lehen bi kapituluak eskainiko dira, gaztelaniaz, eta martxoaren 19an 3. eta 4. kapituluak proiektatuko dira.

Jarduera horien bidez, Debako Udalak bat egiten du emakumeen eskubideen aldeko borrokarekin eta aldarrikapen egun horrekin bat egiteko deia luzatzen die herritarrei, gizarte berdinzaleago baten bidean aktiboki parte-hartzera gonbidatuz.