Debak ongietorria ematen dio udaberriari kultur programa anitz bezain zabalarekin

2025ko apirilaren 1a

Ekainera bitartean, musika, zinema, literatura, antzerkia, dantza eta kirola nagusi izango dira herrian, adin guztietarako antolatutako eskaintza zabalarekin.

Udaberri honetan kultur eskaintza oparoa izango da Deban, adin eta gustu guztietarako osatua. Izan ere, Udaberriko Kultur Gidak herriko kaleetan, plazetan eta kultur espazio desberdinetan garatzeko jarduera eta ekintza andana batzen ditu, ekainera bitartean, herritarren zein bisitarien gozamenerako.

Zinemaren alorrean, ikusleek merkaturatu diren azken filmak ikusteko aukera izango dute. Horien artean nabarmendu daitezke, besteak beste, Siempre nos quedará mañana, La Trenza, Kinds of Kindness, Arthur, laguntasun mugagabea eta La joven y el mar bezalako proiekzioak. 

Musikak ere leku nabarmena izango du egitarauan. Txibrass metal boskotea edota Bidelapurrak talde gaztea izango dira Deban eta, horrez gain, ez dira faltako Debadaba jaialdia, Musika Eskolako ikasleen kontzertuak eta Europako Musika Eguna, kaleetan ospatuko dena Kalean Kantuz dinamika herrikoiaren bidez.

Antzerki eta dantzaren zaleek aukera paregabeak izango dituzte; GOAZ Antzerki Astea, Markeliñeren Art Ilusio haur-antzerkia eta Kulunka taldearen dantza klasiko emanaldia dira ikusgai izango diren emanaldietako batzuk. Horrekin batera, Iagomagoren magia ikuskizuna ere familientzako hitzordu erakargarria izango da.

Literaturak eta sormenak ere presentzia nabarmena izango dute. Irakurketa klubak hilero saioak eskainiko ditu, eta Liburuaren Egunean hainbat ekimen egingo dira, besteak beste Deba 100 hitzetan lehiaketaren eta V. Ilustrazio eta ipuin lehiaketaren sari banaketak.

Zientzia eta heziketa ere kontuan hartu dira. Apiriletik aurrera “Baso bete zientzia” hitzaldi zikloa eskainiko da, eta Treba Gurasoak eta Treba Nerabeak programak elikadura jasangarriari eta bizitzako trebetasunei buruzko saioak proposatuko dituzte.

Gaztetxoentzako eta familientzako jarduerak anitzak izango dira:ipuin kontaketa saioak, Dantzari Txiki Eguna, pala txapelketa mistoa, eta ikasleen lanen erakusketa (taila, zeramika, pintura). Umorea ere presente egongo da Debarron Barretegia umoregileen saioan.

Kirol zaleek, berriz, txirrindularitza lasterketak izango dituzte ikusgai: kadeteen eta juniorren probak antolatu dira udalerrian zehar, baita eta Capoeira Nazioarteko Topagunea ere. 

Egitarauaren ardatz garrantzitsuetako bat izango da Euskaraldia, zeinak euskararen erabilera soziala sustatzeko ekimen ugari bilduko dituen: azokak, kuadrillen jolasak, hitzaldiak, mahainguruak eta pentsiodunen mugimenduaren parte-hartzea.

Azkenik, herriko tradizioak ere bere tokia izango du: Debarren Eguna, Itziarko erromeria, San Joan eta San Pedro bezalako ospakizunak… Horrez gain LGTBIQ+ Harrotasun Egunaren ospakizunak aniztasuna eta elkarbizitza aberastuko dute.