Debako euskararen historia soziala berreskuratzeko lanak jarraipena izango du

2020/03/11
Frankismo garaira arteko historia eta testigantzak, neurri batean bederen, jaso diren arren, ez da lana amaitutzat jotzen. 2020-2022 aldian beste ikerketa-proiektu bat garatzea adostu da eta datozen urteetarako lan ildoa edo arreta, bereziki, hezkuntza sisteman jarriko da. Herritarrei, izan dezaketen informazioa martxoa amaierarako helarazteko eskaera egin nahi die udalak.

Gai nagusia, beraz, Debako hezkuntza arloaren ikuspegi soziolinguistikoa aztertzea izango da.

Debako Itziarko ama ikastolaren sorrerari arretaz begiratuko zaio baina aldi historiko hori ikertzeko testuinguru zabalagoa hartuko da kontuan ikerketan.

Zehazki helburu zehatz hauek ezarri zaizkio ikerketari: batetik, aro garaikideko Debako hezkuntzako gertakari nagusiak testuinguratzea; Itziarko ama ikastolaren aurrekariak, sorrera eta garapena azaltzea; era berean kontuan hartuko da Ostolaza ikastetxe publikoak euskalduntze bidean egindako urratsak eta ikastolaren publifikazio prozesuaren ondorioz sortutako Luzaro eta Mendata ikastetxe publikoen ekarpena Debako euskararen biziberritzean.

Eskaera bat ere luzatu nahi zaie herritarrei, gai horien inguruan etxean gordeta izan ditzaketen dokumentuak eta irudiak (aktak, argazkiak, txostenak…) udaletxera ekar ditzaten, ikerketarako oso baliagarriak izango baitira. Dokumentu horiek udaletxeko euskara zerbitzuan digitalizatu eta momentuan bertan itzuliko dira.

Otsaila amaieran banatu zen Debako Euskararen Historia Soziala biltzen duen dokumentala, Gaztelekuko gazteen bitartez, etxez etxe.