Debako Udalak abuztuaren 3an jarriko ditu salgai Mariñel Eguneko bazkarirako txartelak

2026ko uztailaren 27a

Bazkaria abuztuaren 17an izango da frontoian, 15:00etan. Txartel bakoitzak 23 euroko prezioa izango du, eta menu beganoa ere aukeratu ahal izango da Txartelak Debako Turismo Bulegoan egongo dira salgai, abuztuaren 3ko 10:00etatik aurrera. Pertsonako gehienez 4 tiket erosi ahalko dira.

Debako Udalak abuztuaren 17an, Mariñel Egunean, egingo den herri bazkarirako txartelak jarriko ditu salgai. Txartelak abuztuaren 3tik aurrera eskuratu ahal izango dira Debako Turismo Bulegoan, 10:00etatik aurrera, 23 euroko prezioan. Pertsona bakoitzak gehienez 4 tiket erosi ahalko ditu.

Bazkaria frontoian egingo da, Euskal Parrillaren eskutik. Menu nagusiak entsalada mistoa, baserriko oilaskoa parrillan, txerri saiheskiak parrillan, pasteltxo dastaketa, ogia, kafea eta edariak izango ditu.

Horrez gain, menu beganoa ere eskainiko da. Aukera horrek entsalada mistoa, barazki menestra, lasaña beganoa, postrea, ogia, kafea eta edariak izango ditu.

Elikadura-alergiaren edo -intolerantziaren bat duten pertsonek, zeliakia kasu, txartela erosteko unean jakinarazi beharko dute, antolakuntzak beharrezko neurriak hartu ahal izan ditzan.

Bazkariaren ordutegia eta antolaketa

Frontoia 14:30ean irekiko da. Euskal Parrillak mahaiak jarri arte ezingo da tokirik hartu. Bazkaria 15:00etan hasiko da, eta bertaratuei puntualak izateko eskatu zaie, 15:30etik aurrera iristen direnei ez baitzaie bazkaririk zerbitzatuko.

Bazkaria amaitutakoan, kuadrilla bakoitzak bere hondakinak eta erabilitako material propioa dagokion tokian utzi edo bota beharko ditu. Euskal Parrilla arduratuko da mahaiak eta aulkiak jasotzeaz (antolatzaileek mahaiak jarri arte itxaron beharko da tokia hartu ahal izateko). 

Debako Udalak parte-hartzaileei arduraz jokatzeko, hondakinak horretarako prestatutako ontzietan uzteko eta frontoiko espazioa ahalik eta ondoen zaintzeko eskatu die, Mariñel Eguneko herri bazkaria giro onean eta errespetuz ospatu ahal izateko.