Baratza proiektuarekin jarraitzeko asmoz, beste bost urtez alokatuko du Udalak erriberako lursaila

2019/01/08
Proiketu hau laneratzeko eta gizarteratzeko zailtasunak dituzten pertsonei zuzenduta dago, autonomia pertsonala garatu eta gizartean integratu daitezen.

Duela pare bat urte, Debako Udaleko gizarte zerbitzuek eta Karitasek erriberan baratza proiektua jarri zuten martxan, 1.000 metro karratuko lursail batean. Aipatu lurren alokairu kontratua 2016ko irailean sinatu zen lehendabiziko aldiz urtebeterako. 2017ko uztailean, aldiz, alkatetza dekretu bitartez hitzarmenaren luzapena erabaki zen, beste urtebetez.

Gizarte-zerbitzuek, lanbide-baratzaren kudeaketaren ardura duten aldetik, baratza okupazionalen zerbitzua baikorki balioesten dute; gainera, aipatutako lurrak baratza proiektu gisa erabiltzen jarraitzeko egokiak direla uste dute. Hori dela eta, Udalak lur horiek beste bost urtez alokatzeko erabakia hartu du. Epe hau hiru urtez luzatu ahal izango da. Alokairuaren urteko kuota 1.000€ + KPI izango da (sei hileko bi kuotatan ordainduko dena).

Baratza proiektua

Proiektu hau laneratzeko eta gizarteratzeko zailtasunak dituzten pertsonei zuzenduta dago; autonomia pertsonalaren garapenerako baliabideak eskaintzen zaizkie eta integrazio soziokulturala ahalbidetzen die.

Bi urte hauetan 26 parte-hartzaile izan dira guztira. Egun, Karitaseko bizpahiru bolondresen eta udal gizarteratzeko teknikoaren gidaritzapean, sei pertsona ari dira bertan lanean.

Jasotako uztaren zati bat parte-hartzaileen artean banatuko da, eta gainontzekoa herriko elikagai bankura eramango da, behar dutenen artean banatzeko.