Debako Udalak bat egiten du gaur, maiatzak 17, Homofobiaren, Lesfobiaren eta Transfobiaren Nazioarteko Egunarekin

2024ko maiatzaren 17a

Maiatzaren 17an, ahotsa goratzen dugu LGTBI pertsonen aurkako erasoak eta jasaten duten diskriminazioa salatzeko. .

24 urte igaro dira OMEk homosexualitatea gaixotasuntzat hartzeari utzi zionetik, eta bost urte DSM-5ek (Ameriketako Estatu Batuetako Psikiatria Elkartearen Diagnostiko eta Estatistika Eskuliburua) transexualitatea buruko nahasmendu gisa ezabatu zuenetik. Jendarteak aurrera egin duen arren, egun LGTBI pertsonek diskriminazio egoerak bizi dituzte euren eguneroko bizitzan. Horregatik, ezinbestekoa da gure jendarteak genero-identitate, orientazio eta adierazpen guztiak errespetatzea eta horien kontra ematen diren indarkeriei aurre egitea.

Ez dugu inolako bazterkeriarik, diskriminaziorik eta indarkeriarik nahi. Aske bizi diren herritarrak nahi ditugu eta horretarako norberak bere sexualitatea, orientazioa, generoa eta adierazteko modua askatasun osoz bizitzeko aukera izatea ezinbestekotzat jotzen dugu.

Hau honela, maiatzaren 17 honetan eta urteko gainontzeko egunetan egin behar den bezala sexu- eta genero-aniztasunarekiko gorrotoak eragindako erasoak salatzeko konpromisoa berresten dugu. Debako Udalak gizarte justu, parekide eta eraikitzaileago bat bultzatzen jarraituko du.