Debaren eta Itziarren arteko gaur egungo elkarlana eredu gisa aurkeztu dute Gipuzkoako Batzar Nagusietan

2022ko martxoaren 4aDebaren eta Itziarren arteko gaur egungo elkarlana eredu gisa aurkeztu dute Gipuzkoako Batzar Nagusietan

Debako alkate Gilen Garcia eta Itziarko auzo-alkate Arantza Egaña Gipuzkoako Batzar Nagusietan egon dira asteon, Gipuzkoako udal barrutiak erregulatzen dituen foru-arauaren berrikuspenari buruz eztabaidatzeko sortutako Ponentzian. Biek nabarmendu dute gobernantza eredu partekatua, eta gaur egun bi erakundeen artean lortutako harremanak herritarrentzat dakarren onura.

Debako udalerriaren inguruko informazio geografikoa, historikoa, soziologikoa... eman diete bi ordezkariek Gipuzkoako batzarkideei, eta baita auzo udala sortzeko prozesuaren ibilbidearen berri ere. Elkarrekin eta elkarlanean eredu berriak bilatu bilatu izana nabarmendu dute bi ordezkariek. 

“Gatazkatik kooperaziora”, horrela laburbildu du Debako alkate Gilen Garciak Debako eta Itziarko erakundeen arteko harremana. Eta azken emaitza hori izateak, eredu bilakatu du entitate txiki bihurtzeko prozesua egin nahi duten beste herrientzat. Eredu berri bat sortu dutela partekatzen du alkatearekin Itziarko auzo-alkate Arantza Egañak ere.

Egañak bere horri lotuta bere hitzartzean nabarmendu du “lana latz eginez gainditu zen desadostasuna, eta momentu honetan Deban bertan sorturiko hainbat mamu bertan behera uztea lortu dugula esan dezaket harrotasunez, 2020ko abenduan lehen aldiz sinatu genuen hitzarmena medio”. Aho batez adostu zuten hitzarmena Debako udalbatzako hiru alderdiek eta Itziarko Auzo Udalak. 

Akordioetara heltzeko gaitasunari garrantzia eman dio Garciak, eta dagoen potentzial humanoa, politikoa eta soziala nabarmendu ditu. Ildo horretan kokatzen da, halaber, Debako udalbatzaren otsaileko osoko bilkuran zabalik zegoen errekerimenduaren gaia istea erabaki izana. 

Azken hilabeteotako praktikak erakutsi du entitate txikien figurak hainbat abantaila dituela herritarrentzat, batez ere hurbiltasunari begira, bai maila fisikoan eta baita psikologikoan ere. 

Kooperaziori esker entitate bakoitzari dagozkion zerbitzuak zeintzuk diren zehaztu da, eta horiek nola uztartu erabaki da, eskumenak kontuan hartuta. Erakundeen lana erraztu da, eta batez ere hobetu egin da zerbitzua udalerri osoko biztanleentzat. 

Gipuzkoako Batzar Nagusietako aurkezpenaren bideoa hemen.