Egungo egoerara moldatutako aurrekontu proposamena landuko da ohiko osoko bilkuran

2020/04/30
COVID19 birusak eragindako osasun alarma egoeragatik Debako udalak ezin izan zituen 2020rako aurrekontuak aurreikusitako epean onartu. Gaur, apirilaren 30ean, modu telematikoan egingo den ohiko osoko bilkuran landuko den gaietako bat izango da aurrekontuena. Eta, aurreikusita zegoen bezala onartu beharrean, egoera berri eta berezi honetara egokitzea, doitzea erabaki da.

Ibilbide luzea egin du aurrekontuaren lanketak. 

2019ko irailean hasi zen 2020ko aurrekontuaren barne mailako lanketa, eta udazkenetik aurrera Ogasuneko batzordeetan. Alderdi guztien eta Itziarko Auzo Udalaren ekarpenak jasotzea eta aurrekontuak adostasunez osatzea izan da udal gobernuaren helburua.

Martxoaren 11ko Ogasun batzordearen 2020ko aurrekontuek oniritzia jaso zuten eta martxoaren 17ko ez-ohiko osoko bilkuran onartzeko asmoa bazegoen ere, hau bertan behera geratu zen COVID19 birusak eragindako alarma egoeragatik.

Ez-ohiko osoko bilkura atzeratzea erabakita beraz, eta bideo-dei bidez 'elkartzeko' aukera aztertzen ari zela Gipuzkoako Foru Aldundiak jakinarazi zuen lurralde osoko udalerrietan udalek jasotzen duten Foru Funtsaren %20-25eko murrizketa aurreikusten zuela (Debako udalaren kasuan 4.000.000€ zegoen aurreikusita 2020rako).

Udalbatzako 3 alderdietako (EH Bildu, Debarren Ahotsa eta EAJ-PNV) eta Itziarko Auzo Udaleko ordezkarien artean egoerak eskatzen duen proposamena landu da, kontuan izanik:

  • Gizarte zerbitzuak indartu egin beharko direla.

  • Debako merkataritzan, ostalaritzan eta negozio txikietan eragin ekonomiko kaltegarria izango duela egoera honek. 

  • Kirol, kultur, jai ekimen gehienak ezingo direla ospatu.

  • Zein partida edo gastu diren ezinbestekoak eta zein ez-ezinbestekoak.

  • Diru Funtsaren murrizketa.

  • Zuzeneko diru-sarreren murrizketa: merkatarien (taberna, jatetxe, denda, nekazal etxe…) zaborren zergak, kiroldegiko eta musika eskolako kuotak, taberna/jatetxeen terrazen zergak, Trafiko eta Aparkamenduaren Ordenamenduagatik (TAO) kobratzen dena, isunetatik jasotzen dena…

Zinegotzien asignazioak gizarte zerbitzuetara bideratzeko erabakia hartu da (oraingoz hiruhilabeteko batekoa, baina egoera luzatuz gero beste hiruhilabeteko batekoa edo gehiagokoa), larrialdietarako poltsa bat sortuz.