Egungo egoerari erantzuteko aurrekontuak onartu ditu Debako udalbatzak

2020/05/04
Apirilaren 30ean, telematikoki egindako osoko bilkuran onartu ditu 2020rako aurrekontuak Debako udalak. COVID-19ak eragindako egoerara moldatutako aurrekontuak dira; pandemiak egoera zaurgarrian eta laguntza beharrean utziko dituen herritarren zama arintzeko bideratuko dira indarrak. EH Bildu eta EAJ-PNVren aldeko botoekin eta Debarren Ahotsaren abstentzioarekin onartu dira. Modu telematikoan egindako osoko bilkuran landutako gainontzeko gai guztiak gehiengo osoz onartu dira.

Udal gobernuak proposatu eta denon artean landu eta osatutako aurrekontuak dira. Aurrekontu onak, aproposak, une berezi honetan debarrak bizitzen ari diren egoera desberdinei erantzuteko asmoa dutenak. Koronabirusak eragindako albo ondorio negatiboak ahal den neurrian -udalaren eskumena mugatua baita- arintzera bideratutakoak”, Gilen Garcia alkatearen ustez. Udala osatzen duten alderdiekin eta Itziarko Auzo Udalarekin elkarlanean landu dira eta herriko eragileekin ere egin da egoeraren berri emateko hartu-emana. 

Martxoaren 11ko Ogasun batzordean jaso zuten aurrekontuek oniritzia eta 17an landu eta onartzeko aurreikuspena zegoen, baina osasun alarma egoerak eraginda atzeratu egin behar izan zen prozesua. Udala berregokitzea lantzen ari zela, Gipuzkoako Foru Aldundiak jakinarazi zuen Foru Funtsaren kopurua %20-25 murriztuko zuela. Debako udalak, 800.000- 1.000.000 euro gutxiago jasoko du. 

Hori aintzat hartuta eta egoera berriari erantzuteko asmoz landu da, bada, aurrekontu proposamena. Debako 2020koaurrekontu bateratua 8.170.000 eurokoa izango da; hortik Udalarena 7.918.000 eurokoa, Itziarko Auzo Udalarena 957.000 eurokoa (177.000€ murriztu beharrean 140.000 euroan murriztuko da, beraz) eta Deba Musikal Patronatuarena 606.000 eurokoa da. 

2020rako aurreikusita zegoen aurrekontuan, ongizate politiketara bideratutako indartu da bereziki, 66.000 euro igoko da guztira. Ogasunekoa ere indartu egingo da. Izan ere, bereziki ongizate politika arloan, baina baita ogasunean ere, laguntzak bideratuko dira egoera honek gehien kaltetutako pertsonentzat. Gainontzeko sailetarako partidak, ondorioz, murriztu egin behar izan dira. 

Gizarte zerbitzuetan etxez etxeko laguntza zerbitzuaren partida, arriskuan dauden adingabeena eta gizarte beharrizan larrietarako laguntzarena igo dira (30.000 euro). Eta "Stop alzheimer" proiekturako partida berria sortu da.

Gizarte zerbitzuetara bideratuko dira, halaber, zinegotzien dietak (9.000) laguntzarako poltsa sortzeko. 

Bestetik, herriko merkatari, ostalari eta enpresa txikiak laguntzeko, 20.000 euroko diru-partida onartu da, laguntza-bonuen bitartez kudeatuko dena, Kuttuna proiektuaren bidez. 

Euskara eta kulturako sailean eta hezkuntza-gazteria-kirola sailean, osasun segurtasunagatik egin ezingo diren ekimenetako partidak murriztu dira, eta baita eragileei ematen zaizkien diru-laguntzak ere, beraiekin adostuta. Egoerak onera eginda, eta kultura eta kirol ekimen jendetsuak egiteko aukera zabalduko balitz, nola bideratu aztertuko litzateke. 

Zerbitzuetako partidetan gutxieneko kopuruak mantendu dira eta berri bat sortu egoera honek eskatzen duen materiala erosteko (eskularruak, maskarak, manparak, desinfektatzeko produktuak...).

Inbertsioak ere murriztu dira, baina mantendu ditugunen artean aipatzekoak: Errementari-Mogel urbanizatzea, hondartzako kabinak berritzea, GIS sistema ezartzea, eskolako jangelako sabaia eraberritzea, haur eskolako kristalak aldatzea, kiroldegirako bizikletak erostea, Agirre jauregiko dantzako lurra berritzea, Errotazarko hesia berritzea, merkatuko postuetarako materiala, 'Deba, historiaurreko bailara' proiektua. 

  

BILERAREN BIDEOA

BILERAREN GAI ORDENA