Emakumeentzako surf ikastaroan izena emateko epea zabalik dago apirilak 12 arte
2024ko apirilaren 5aIkastaroa apirilaren 15ean hasiko da eta ekainaren 2ra arte iraungo du; guztira 7 saio izango dira.
Debako Udalak Emakumea* surflari ikastaroa antolatu du beste urte batez, emakumeei* surfaren oinarrizko ezagutzak eskuratzeko aukera emateko, ur kirolez gozatu ahal izateko konfiantza, ahalduntzea eta autonomia landuz. Ikastaroa 16 urtetik gorako emakumeei* zuzendua da.
Ikastaroa apirilaren 15etik ekainaren 2ra bitarte izango da, guztira 7 saio, eta bi maila desberdin izango ditu, partaideen ezagutzaren arabera. Saioak astearte eta ostegunetan izango dira, 17:30etatik 19:30etara, eta taldeak gehienez 6 lagunekoak. Norberak bere neoprenoa eraman beharko du, eta hastapen-mailetarako kortxo-taulak erabilgarri egongo dira, baina gainontzekoek norbere taula ebolutiboa edo gogorra eraman beharko dute.
Prezioan asegurua barnebiltzen da, eta guztira 150 eurokoa izango da. Dena den, hainbat deskontu aukera daude: langabezian dauden emakumeentzat* eta 60 urtetik gorako emakumeentzat* %30ekoa, eta egoera ahulean dauden emakumeentzat* %100ekoa (DBE/RGI laguntzen onuradunak, indarkeria matxista jasandakoak…).
Izen ematea
Ikastaroan izena emateko epea zabalik dago apirilak 12 arte. Turismo bulegoan aurrez aurre, 943 19 24 52 telefonora deituta edo turismoa@deba.eus helbidera idatzita eman daiteke izena.