Eskolako Agenda 21 proiektuko proposamenak aurten bideoz erantzun ditu Debako udalak

2020/06/05
Aurtengo ikasturtean ekoizpen eta kontsumo jasangarriaren gaia landu dute Debabarreneko ikasleek, tartean Luzaro eta Mendatako ikasleek, Eskolako Agenda 21 programaren baitan.

Aurten, bizi dugun osasun krisi egoera dela eta, urteroko Eskolako Agenda 21eko udalbatzarra egin beharrean, udalek bideo bidez erantzun diete ikasleen eskaera eta proposamenei. Gaur, ostirala, Ingurumenaren Mundu Eguna ospatzen dela aintzat hartuz,  Agenda 21 proiektuan parte hartzen duten ikasleei Debako udalak beren proposamenen erantzunak bideo bitartez bidali dizkie. Bideo honetan joan zen urtean proposaturiko ekimenen errepasoa ere egiten da.

 

Aurtengo ikasturtean ekoizpen eta kontsumo jasangarriaren gaia landu dute Debabarreneko ikasleek Eskolako Agenda 21 programaren baitan. Ikasleek Udalari egindako ekarpenen artean ondorengokoak daude: 

  • Herriko etxeetara txorrotako uraren alde onei buruzko informazioa bidali eta plastikoko botilen alde txarrak adierazi. 
  • Bertako produktuen eta produktu ekologikoen kontsumoa bultzatu, herriko azokari indar gehiago emanez. 
  • Herriko faroletan LED argiak jartzea, kontsumoa murrizteko. 
  • Nekazaritza ekologikoa bultzatzea bertako barietateak mantendu eta saltzeko laguntzak eskainiz. 

Hauez gain, bi ikastetxeetako ikasleek, Debako udalak banatuko dituen oihalezko poltsen diseinuan ere lagundu dute. Luzaron egin dute marrazkia eta leloa, berriz, Mendatan. 

Egitasmoa Eusko Jaurlaritzak diruz laguntzen du eta ikastetxeek, Debako udalaren, Ingurugelaren eta Debegesa Garapen Agentziaren laguntza jaso dute.

Eskolako Agenda 21 Debabarrenean

19 urte daramatza Debegesak, Debabarreneko Garapen Agentziak, udalekin elkarlanean, eskualdean Eskolako Agenda 21 egitasmoa sustatzen eta koordinatzen. Eskola-komunitateari zuzendutako garapen jasangarrirako heziketa programa bat da Eskolako Agenda 21. Egitasmoak hiru helburu ditu:

  • Ikastetxeak ingurumen eta gizarte jardunbide egokien eredu bihurtzea.
  • Ingurumen eta gizarte-arazoak identifikatzeko eta horiei konponbidea emateko gai diren ikasleak heztea.
  • Partaidetza  eta ingurumenarekiko errespetua sustatzen duen hezkuntza bermatzea.

 

Guztira, 30 ikastetxe ari dira parte hartzen Debabarrenean Eskolako Agenda 21 programan. Programaren baitan, hezkuntza komunitate osoari zuzendutako ekintzak antolatzen dira, ikasle, irakasle eta familiei.