Garapenerako lankidetza protagonista asteon

2021/10/15
Garapenerako Lankidetzaren astea da hau Deban. Atzo, urriak 14, Kultur Elkartean egindako ekitaldian aurkeztu ziren 2019an eta 2020an debarren laguntzari esker gauzatu diren proiektuak. 2020an, osasun egoeragatik ezin izan zen aurkezpenik egin, hortaz, oraingoan aurreko bi urtetakoen aurkezpena egin da.

Askotariko proiektuak gauzatu dira bi urteotan. Esaterako, elikagai ekoizpenaren bidez elikadurarako eskubidea sustatu; komunikaziorako bitartekoak landu; emakumeen eskubideetan eta ahalduntzean urratsak eman; hezkuntza indartu; osasun sorospena eskaini...

Hirugarren aldiz Elkartasun Azoka egingo da, Plaza Zaharrean 10:00etatik 14:00etara. Egunari hasiera txistulariek emango diote ordu erdi lehenago, 09:30ean Kalez kale txistulari taldea ibiliko baita herriko kaleak girotzen. 

Azokara bertaratzen denak beste herrietako ohiturak ezagutzeko aukera izango du. Elkarte hauek jarriko dute postua aurten: 

  • Salvamento Maritimo Humanitario.

  • Berdinak Gara, Primavera del Ixcán.

  • Mugarik Gabe.

  • Lumaltik.

  • Kooperazio Taldea.

  • Liburu Solidarioak.

  • Zaporeak.

Janari bilketa ere egingo du Zaporeak elkarteak azokan. Arroz luzea, makarroiak eta dilista Pardinak jasoko dituzte.

Astea amaitzeko Iciar Bollain-en 'Tambien la lluvia' filmaren proiekzioa egingo da. Urriaren 17an, igandea, 19:00etan, Kultur Elkartean.