Guk ere gehiago, gehiagorekin, gehiagotan

Egungo egoerak hainbat ekimen mota (jendetsuak) egitea ahalbidetu ez badu ere, Debako Euskaraldiaren herri batzordeak lan handia egin du herria girotzen, jendeak izena eman dezan mahaiak jartzen... Baita aurten berrikuntza izango diren ariguneak sor zitezen eragiten ere. Eta Debako udalak sostengatzen du Euskaraldia ekonomikoki, beharrezko material eta azpiegituraren kargu eginez eta euskara teknikariaren lanordu batzuk eskainiz horretara. 

Aurtengo berrikuntza ariguneena da (euskaraz eroso aritzeko guneak. Deban ia 80 arigune sortu dira. Tartean, Udala. Debako udalean kanpo-ariguneak berezkoak dira, herritarrekin harremanetan dauden langileek lehen hitza euskaraz egiten dutelako eta euskaraz aritzen direlako, herritarrek hala nahi duten guztietan. 

Barne ariguneak ere sortu dira Udalean. Udal bulegoak, Turismo bulegoa eta Geoparkea, Udal liburutegia, Musika eskolako zuzendaritza eta Musika eskolako hizkuntza musikaleko taldea izango dira arigune. 

Debako udalak, aldarrikatu nahi du horrelako ekimen batean herri euskaldunek duten garrantzia, izan ere, euskararen normalizazioan estrategikoak dira eta eredu eta akuilu izan daitezke gainontzekoentzat. 

Aritz Larrañaga euskara zinegotziak uste du, halaber, “une oso egokia da, gainontzeko pertsonekin batera, hizkuntza-ohiturak aldatzeko. Euskaraz ongi jakin ez, edota jakin bai, baina erabiltzeko ohitura handirik ez dutenak gonbidatu nahi ditut parte hartzera. Gutxi ulertzen duten horiek euskararen eta euskaldunen komunitatera gerturatzeko baliatu behar dugu. Ez bakarrik 11 egun horietan, ahalegina egin behar da egun horietan hartzen den hizkuntza-ohitura urte osoan mantentzeko”.