Gutizi Ekologikoen Ibilbidea egingo da Deban Debabarreneko IX. Aste Ekologikoaren baitan

2020/09/30
Aurten Debabarreneko aste ekologikoaren egitarauaren baitan, Deban ere ekintza ezberdinak egingo dira Urriaren 9an, ostiralean. Biolur Gipuzkoako Nekazaritza Ekologikoaren elkarteak, azoka ekologikoen kanpainaren baitan gure eskualdean Eibarren antolatzen du azoka ekologikoa eta ekintza ezberdinak egin izan dira urtero. Aurten Debemen eta Debako Udalaren laguntzarekin Deban egingo dira ekintza hauek. Ostalariekin elkarlanean Gutizi Ekologikoen Ibilbidea antolatu da.

Ekimen honekin ostalaritzarekin zubiak eraiki, eta baserritar ekologikoen produktuak ikustaraziz balioan jartzea nahi da. Tabernetan eskualdeko osagai ekologikoekin eginiko pintxoa eta Euskal Herriko BIBA ARDOAK kooperatibako ardo ekologikoa 2 euroren truke dastatzeko aukera izango dute hurbiltzen diren lagunek. 

Deban gutizi hauek, Atozte, Bordatxo, Izenbe, Labatai, Mazzantini eta Zalburdin izango dituzue.

Gutizi ekologikoen ibilbideaz gain, Kultur Elkarteko plazan, 18:00etan Trakamatraka taldearen eskutik umeei zuzendutako material birziklatuarekin egindako kontzertu didaktikoaz gozatzeko aukera izango da.

Larunbatean Urriak 3an, hasiera emango zaio Debabarreneko IX. aste ekologikoari, Eibarren antolatuko den azoka ekologikoarekin. Untzaga gainean dagoen Txaltxa Zelaiko plaza izango da eta ordutegia 10etatik 14ak bitarte. 

Azokan Eibarko, Debabarreneko eta Euskal Herri osoko ekoizleen produktuak izango dira salgai: barazkiak, fruta, ogia, gazta, eztia, olioa, mermeladak, kontserbak, landareak, gatza, algak eta arropak. Produktu guztiak modu ekologikoan zaindu eta artisau eran elaboratu dira.