Hainbat ekimen egin dira Jose Mari Irusta gogoratuz

Jose Mari Irusta Mugarza (1908-11-17) Debako herritarra zen, ANV-ko kidea. Baionara ihes egin zuen gerra garaian eta bertan naziek atxilotu eta Dachaura deportatua izan zen (1944-08-28). Melk-en hil zuten (1944-11-13).

Bere jaiotze egunaren urteurrenean, galtzada-harria ezarri zen bere oroimenez eta lore eskaintza egin zitzaion, familiartekoekin batera egindako ekitaldian. Erakusketa, hitzaldiak... egin dira azken egunotan. Eta udaleko hiru taldeek (EH Bildu, EAJ-PNV eta Debarren Ahotsa) adierazpen instituzionala adostu dute. 

Adierazpenaren bitartez, salatzen dute Jose Maria Irustarekin eta beste milaka pertsonekin egindako bidegabekeria eta ez dute “onartzen nazismoaren edo frankismoaren garaian pertsonen ideia politiko, jatorri edo dena delakoagatik atxiloketa, torturak edota erailketak egitea”. 

Bere familiari euren senideak jasan izandakoagatik elkartasuna eta babesa ere adierazten zaie eta memoria historikoa berreskuratzeko konpromisoari eusten zaio. Halaber, salatzen da, “gaur egun, oraindik ere ideia politiko, jatorriagatiko edo beste arrazoiengatik bazterkeria eta errepresioa sufritu behar izatea eta elkartasuna adierazten diegu”. 

Ez dira amaitu oraindik Irustaren omenez egingo diren ekimenak. Hilaren 22an, hitzaldia egingo da Itziarren, “La fuga del fuerte de Ezkaba” Fermin Ezkieta hizlariaren eskutik. Gaztelaniaz izango da hitzaldia, 19:00etan Burugorri Gainean. 23an eta 24an, berriz, erakusketa izango da ikusgai leku berean. 23an zabalduko da 12:00etan. Ondoren, 12:00etatik 14:00etara eta 17:00etatik 20:00etara.