Herritarrak zuzenean informatzeko erronkari eutsiz Debaberri berritu du Udalak

2019/10/30
Berrituta datorren Debaberri udal aldizkaria jasotzen ari dira herritarrak egunotan. Debako udalak, gardentasunaren alde egin duen apustuari erantzunez eta herritarrekin zuzeneko komunikazioa sustatu asmoz, jada sortuak zeuden tresna komunikatiboak indartu eta berriak sortzeko determinazioa du.

Asmo horren baitan kokatzen da Debaberri aldizkarian egindako aldaketa. Hemendik aurrera, urtean hiru aldiz argitaratzeko konpromisoa hartu du udalak. Gobernu talde honek egin duen Debaberriren lehen argitalpen honetan Gilen Garcia alkateak berak dioen moduan, “egiten duguna zuekin, herritarrokin, partekatu nahi dugu. Horrexegatik, hemendik aurrera ahalik eta modu argi, zuzen eta azkarrenean komunikatzeko asmoa dugu. Hortxe kokatzen dira, hain zuzen, Udalak dituen tresna komunikatiboak, tartean aldizkari hau”.

Urriko ale honetan hainbat gai landu dira, tartean, gai nagusia datozen lau urteotarako gobernu planari dagokio. Itziarko Auzo Udalak atal propioa izango du beti, herritarrentzat ere tarte bat badago, elkarrizketa formatuan. Udalean ordezkaritza duten hiru alderdiei ere (EH Bildu, Debarren Ahotsa eta EAJ-PNV) tarte bat eman zaie haien iritzia zuzenean argitaratu dezaten.

 

Irakurri formatu digitalean