Ikasleei zuzendutako hegaztien eraztunketa egin dute Artzabalen

2021/10/05
Joan den astean Luzaro ikastetxeko laugarren mailakoek gure artean bizi edo atsedenaldia hartzen duten hegaztiak ikusteko eta ezagutzeko aukera izan zuten.

Artzabalgo paduretara bisita egin zuten, eta hainbat hegazti identifikatu, eta kodetu zituzten. Txori bati buruzko informazioa eskuratzeko bide bakarrenetarikoa da eraztunketa. Honen bidez, sexu, adin eta egoera fisikoari buruzko informazioa lortzeaz gain, zenbat urtez bizi diren edota nora migratzen duten jakin daiteke. 

Aurtengoa, Udalak antolatzen duen hirugarren urtea izan da. Urte hauetako informazioa pilatzeko aukera egon da. 

Ikasleek normalean ikusi gabeko hainbat hegazti gertutik ikusteko eta aztertzeko aukera izan dute dute. Era berean, ondare publiko eta naturalaren garrantziaz sentsibilizatzen dira. 

2019an egindako hegaztien erroldaren arabera, ia 100 hegazti espeziek erabili zituzten Artzabalgo padura txikiak. Beraz, nabarmena da aipatutako gunea, bertako zein migratzaile diren hegaztientzat garrantzia duelako. Hainbat txori harrapatu dira aurten, esaterako, errekatxindorra, txinbo kaskabeltza, erregetxoa, zozoa, martin arrantzalea...

Francisco Zufiaur izan da aurten ere lan hauetako ornitologo arduraduna.