Kalakan eta L’incontro Duok irekiko dute XXXV. Udako Musikaldia, Deban

2018/08/02
Hogeita hamabostgarrenez antolatu du Udalak, Gipuzkoako Foru Aldundiaren babesarekin, Debako Udako Musikaldia. Zikloari gaur bertan emango diogu hasiera, Kalakan eta L’incontro Duoren ekitaldiarekin. Kontzertuak abuztuko ostegunetan izango dira, arratsaldeko 8etan, Santa Maria elizan.

Gaur abiatuko da Deban Udako Musikaldia. Urtero bezalaxe, Udalak Gipuzkoako Foru Aldundiaren laguntzarekin antolatu du musika ziklo hau. XXXV. edizio honetan, lau kontzertu izango ditugu abuztuko ostegunetan.

Kalakan eta L’incontro Duo izango dira musikaldiari hasiera emango diotenak. Boskote formatuko elkarlan honek euskal musika eta musika barrokoaren arteko nahasketa goxo bat proposatuko digu. Harpa, oboea, perkusioa, alboka, txalaparta eta ahotsek batera jolastuko dute bi unibertso musikal bateratuz. Gaur bertan, arratsaldeko 8etan, Santa Maria elizako klaustroan estreinatuko dute zikloa.

Hurrengo kontzertua astebete beranduago, hilaren 9an, izango da. Bigarren hau eliza barruan egingo da, Fernando Gonzalo izango baitugu organoan. Berarekin batera arituko dira Jone Bolibar, klarinetean, eta Xabier Calzada, flautarekin.

San Roke jaietako atsedenaren ondoren, abuztuaren 23an itzuliko da udako musika zikloa Alberto Urretxo tronboilariarekin. Honek hari laukote bat izango du lagun, Catalin Bucataru, Iñigo Grimal, Adriana Grigoras eta Javier Martinezek osatua.

Debako musikaldiari bukaera emateaz Txanbela Otxotea arduratuko da, Josean Vegaren zuzendaritzapean. Hauen errepertorioa euskal folkloreko koru lanetan dago oinarrituta.

Kontzertu guztiak arratsaldeko 20:00etan izango dira, meza ondoren. Abuztuaren 9koa, Santa Maria Eliza barruan izango da; gainontzekoak, berriz, klaustroan.

Eskuko programak egunean bertan banatuko dira Eliza atarian. Aurrez ikusi nahi izanez gero, egin klik hemen.