Korrikari aurre hartuz, hainbat ekitaldi izango dira bihar, herria girotzeko helburuarekin

2024ko martxoaren 15a

● Korrikaren 23. edizioa martxoren 20an iritsiko da Debara, 13:23an. ● Debako Korrika Batzordeak antolatu du ekitaldiz betetako biharko eguna.

Deba prest da beste urtebetez euskararen aldeko lasterketari ongi etorria egiteko, Korrikaren 23. edizioari. Bi urtetik behin izaten den ekitaldi garrantzitsu hau, ‘Harro Herri’ lelopean ari da Euskal Herriko herri eta kaleak gurutzatzen; atzo, martxoak 14, hasi zuen ibilbidea Irunen eta martxoaren 24an amaituko du bidea Baionan; 10 egunez Euskal Herriko kaleak zeharkatuko ditu, euskararen aldeko aldarrikapena eginez.

Korrika Deban

Aurten, martxoaren 20an, asteazkena, iritsiko da Korrika Debara, Mendarotik, 13:23ak aldera. Bere egonaldian zehar, 7 km inguru egingo ditu herrian barrena, eta  Mutrikuranzko norantzan utziko du Deba. Lasterketaren lekukoa, euskararekiko konpromisoaren ikurra, 31 eskuk eramango dute, elkarteak, klubak eta tokiko eragileak barne, debarren ordezkari gisa. Debako Udalak Kebab inguruan hartuko du lekukoa, eta Buruzuri tabernaren parean utziko du.  

Ekitaldiz betetako eguna

Korrikari aurre hartuz,  Debako Korrika Batzordeak ekitaldiz betetako eguna antolatu du bihar. 12:00etatik aurrera, Korrikaren material ofiziala erosi ahal izango da arkupeetan; herriko kaleetan, berriz, Debako Musika Bandak eta Aitzuri Abesbatzak alaituko dute giroa. Arratsaldean jaia eta kultura uztartuko dira, Debako lau plaza ezagunetan: Simon Berasaluze, Plaza Zaharra, Foruen Plaza eta Kultur Elkarteko Plazatxoa.

Debako Udalak antolatutako ekintzetan parte hartzera gonbidatu ditu debarrak, herriak euskararekin duen konpromisoa berretsiz.