Lankidetza eta garapenerako dirulaguntzen deialdia abiarazi du Debako Udalak

2026ko maiatzaren 26a

Guztira 67.800 euro bideratuko ditu Udalak elkartasun- eta sentsibilizazio-proiektuak babesteko, nazioarteko lankidetza, garapenerako hezkuntza eta ekintza humanitarioa lantzen duten tokiko entitateei zuzenduta. Entitateek maiatzaren 27tik ekainaren 25ra bitarte dute eskabideak aurkezteko epea.

Debako Udalak lankidetza eta garapenerako proiektu eta jarduerak ekonomikoki sendotzeko helburuarekin 2026ko dirulaguntzen deialdia ireki du. Ekimen honen bidez, nazioarteko elkartasuna sustatuko duten eta biztanleria ahulen bizi-baldintzak hobetzen lagunduko duten jarduerak babestu nahi dira. 

Dirulaguntza-lerro honek tokiko entitateen parte-hartze aktiboa bultzatu nahi du, giza garapen jasangarria eta herritarren kontzientzia solidarioa indartuko dituzten ekimen zehatzetan. Helburua da eragin positiboa sortzen duten proposamenak ekonomikoki laguntzea, bai lankidetza zuzena bideratzen duten proiektuen bidez, bai justizia sozialaren eta konpromiso globalaren balioak zabaltzeko hezkuntza-jardueren bidez.

Deialdiak bost jarduera-lerro finantzatzea aurreikusten du:

• Nazioarteko lankidetza proiektuak.
  
  

• Sentsibilizazio eta garapenerako hezkuntza jarduerak.
  
  

• Larrialdi egoeretan ekintza humanitarioak.
  
  

• Adingabeen aldi baterako harrera programak.
  
  

• Tokiko gazte kooperanteen parte-hartzea.

Udalak 67.800 euroko aurrekontua bideratu du deialdi honetarako.

Eskabideak
Eskabideak aurkezteko epea 30 egun naturalekoa izango da, maiatzaren 27tik ekainaren 25 bitarte. Eskabideak dirulaguntza-lerro bakoitzerako aurreikusitako dokumentazioarekin eta oinarrietan ezarritako moduan aurkeztu beharko dira. 

Kontsultatu oinarri guztiak hemen.