Larunbat honetan hasiko dira Itziarko Kopraixak

2016ko abuztuaren 4aLarunbat honetan hasiko dira Itziarko Kopraixak

Larunbat honetan, abuztuaren 6an, Kopraixak hasiko dira Itziarren eta asteazkenera bitarte bost eguneko egitarau zabala antolatu dute auzolanean.

Urtero bezalaxe, abuztuaren lehen larunbatetik hurrengo asteazkenera bitartean Itziarko Kopraixak ospatuko dira. Bost egun hauetan zehar musikak eta ekintza ugarik girotuko dituzte Itziarko plaza eta kaleak; Kopraixetako komisioak egitarau zabala antolatu baitu herritarrekin auzolanean.

Abuztuaren 6an arratsaldeko 19:00etan emango zaie hasiera jaiei, txupinazoa eta Marixiren jaitsierarekin batera. Aurretik, I. Itziar Trail ospatuko da aurreko urteetako Andutz igoeraren ordez. Igandean, festa hauetan ohikoak diren zezenen ondoren Meza Nagusia egongo da. Gauean Aukeran dantza konpainiaren "Maurizia" ikuskizunaz gozatzeko aukera izango dugu. Astelehenean bikoteen eguna ospatu ohi da Itziarren: herri bazkaria eta bikoteen arteko jolasak eta dantzak dira nagusi egun horretan. Abuztuaren 9an, etxeko txikienak izango dira protagonistak; zezenak, jolasak, dantzak, pottokak, karaokea ...Ez dute aspertzeko astirik izango! Azkenik, gazteen egunarekin amaituko dira jaiak hilaren 10ean, asteazkenean.

Egitarau osoa ikusi nahi izanez gero, egin klik hemen.

Gaueko autobus zerbitzua

Abuztuan sartzearekin batera, Lurraldebus enpresak DB05 Ondarroa-Zumaia autobus-linearen ordutegia zabaldu du. Bestalde, Kopraixak direla eta  gaueko autobus zerbitzua eskainiko du Deba eta Itziar artean larunbatean eta asteazkenean.