Neurri berriak COVID-19aren hedapena gelditzeko: gazte lokalak itxita

2020/07/17
Atzotik aurrera (uztailak 16) Araban, Bizkaian eta Gipuzkoan derrigorrezkoa da maskara erabiltzea. Horrekin batera Eusko Jaurlaritzak jakinarazi duenez, debekatuta dago gazteen lonjetan egotea. Horregatik, udalak hauek ixteko agindua eman du. Eta tabernetan gehienez ere 10 pertsonako taldeak batu daitezke.

Honenbestez, atzoz geroztik Debako gazte lokalak itxita daude osasun agintarien aginduak jarraituta. Osasun agintariek egunotan jakinarazi dutenez, COVID-19a gure artean dago eta ondorioz, segurtasun neurriak malgutu ez, zorroztu egin behar dira agertu diren azken kasuak aintzat hartuz. Deban bertan joan den aste amaieran lau kasu atzeman zituzten. Ingurukoei frogak egin ondoren, osasun zentroak udalari jakinarazi dio kontrolpean dagoela egoera eta ez dela fokurik sortu, momentuz. Hala ere, Debako udalak eskatu nahi dizue zuen burua zaintzea eta osasun agintariek ematen dituzten aholkuak jarraitzea, denon onerako izango baita.