Ohiko osoko bilkura egin du Debako udalbatzak

2020/05/29
Atzo (maiatzak 28) egin zuen Debako udaleko udalbatzak maiatzeko ohiko osoko bilkura. Gai ordenan jasotako gai guztiak gehiengo osoz onartu ziren. Aitzitik, azken orduan Gipuzkoako foru funtsa murriztu izana eta hau egiteko modua salatzeko aurkeztutako mozioak aldeko 10 bozka (EH Bildu eta Debarren Ahotsa) eta kontrako hiru (EAJ-PNV) jaso zituen. Osasun alarma hasi aurretik modu presentzialean egin zen lehen osoko bilkura izan da, nahiz eta ateak itxita, publikorik gabe egin.

Honela bada, besteak beste, Garapenaren Aldeko Nazioarteko Diru-laguntzak norgehiagoka prozedura bidez esleitzeko 2020ko deialdia onartu zen. Bestetik, Covid-19aren pandemiak eragindako alarma egoerak irauten duen bitartean bizitegi-bazterketa egoeran dauden pertsonak artatzeko Debako erromesen aterpetxea atondu da eta hainbat pertsona hartu ditu. Eskualdeko udalek (Eibar, Elgoibar, Mutriku, Mendaro, Soraluze eta Deba elkarlanean ematen dute zerbitzua eta atzoko osoko bilkuran lankidetza-hitzarmena berretsi zen. 

Kultura eta euskara arloari lotuta, bestetik, bi hitzarmen onartu ziren. Alde batetik, Tene Mujika Bekaren oinarriak eta aurrekontua onetsi ziren. Bestetik, Debako Euskararen Historia Sozialaren lanketan jarraitzeko, hitzarmena izenpetu da HUHEZIrekin. 

Gipuzkoako foru funtsa %20 murriztu izana salatzeko egindako mozioan, jasotzen da, “zerbitzu publikoak garatzeko ezinbestekoa den finantzazioaz ari gara hizketan, udalen eguneroko kudeaketan eta herritarren bizitzan eragin zuzena duten erabaki politikoez.”  Horregatik, Debako udalak Gipuzkoako Foru Aldundiari elkarrizketa eta elkarlana eskatu dizkio. 

Udalak erabaki honen berri emango dio Gipuzkoako Aldundiko Diputatu Nagusiari, Ogasun Diputatuari, Gipuzkoako Batzar Nagusietako alderdi guztiei eta EUDELeko Gipuzkoako eta EAEko zuzendaritzei.