Ona izan da 2021eko hondartza denboraldia

2021ko urriaren 1aOna izan da 2021eko hondartza denboraldia

Baikorra da, oro har, Udalak 2021eko hondartza-denboraldiaz egiten duen balorazioa. Denboraldia iazkoaren antzekoa izatea espero bazen ere, eguraldiak eraginda edota bestelako faktoreengatik, jende gutxiago etorri da. Edukiera gainditzeagatik ez da hondartza itxi behar izan egun bakar batean ere.

Aurten itsasoa iaz baino lasaiagoa egon da, eta horrek sorosleen lana erraztu du. Iaz baino erreskate gutxiago egin dituzte sorosleek: guztira 7. Lagundutako bainu-zerbitzuak ondo funtzionatu du. Zerbitzua maiz erabiltzen duten pertsonak daude. Horietako batzuk haien kabuz moldatzen dira jarritako aulkiarekin, eta beste batzuei, berriz, lagundu egiten zaie. 

Goizetan surf gune berria egokitu da kai-mutur inguruan, ikasleak espazio desberdinetan kokatuz pilaketak ekiditeko helburuarekin. Erdiko gunea bainu-hartzaileentzat utzi da. Neguan ere hala izatea eskatu zaie eskolei.

Aurten bainuko ur-kalitatea bikaina izan da gehienetan, beraz, ez da bainua debekatu behar izan. Algak sorrarazitako azkura-kasu (prurito) oso gutxi egon dira. 

Udalak antolatutako Uda Kirola programa martxan jarri zen ekainean, eta lau kirol aukera eskaini dira aurten: surfa, body board, arraun surfa eta skate-surfa. Azken hori berria izan da. Oso harrera ona izan dute guztiek, eta 400 gazte inguruk hartu dute parte, iaz baino zertxobait gutxiago. 

Udalak ezarrita duen Iso 14001 Ingurumen kudeaketa sistema beste hiru urtetarako berritu da irailean. Sistema horri esker indarrean dagoen legedia betetzea, eta etengabeko hobekuntza egiten da hondartzan: zerbitzuetan, instalakuntzetan eta kudeaketan, esate baterako hondartzako Ingurumen-aspektuak kontrolatuz. 2020ko datuak ikusita koronabirus pandemiak eragin positiboa izan du baliabide naturalen kontsumoan (ura eta energian), ez ordea hondakinen sorreran, honen kopurua asko igo baitzen. 

Hondartza denboraldia amaituta, pasarelak eta dorretxoa kendu dira. Dutxak irailaren amaiera arte egongo dira eta urritik aurrera, berriz, 2 dutxa jarriko dira urte osoan hondartza erabiltzen dutenentzat

Udala jakitun da pasarelak sarrera guztietan, toldoak eta oinak garbitzekoak ez izateak deserosotasuna sortzen duela. Baina lehentasuna izan da hondartzaren azalera ahalik eta ondoen aprobetxatzea. Hurrengo urtera begira, eta ohiko egoerara itzuliko garenaren esperantzan, zerbitzu guztiak martxan jartzea espero du.