Osasun egoerak eragindako beharrei erantzutearekin batera aurreikusitako ekimenak ere gauzatu ditu Debako Udal Gobernuak 2020an

2021ko urtarrilaren 22aOsasun egoerak eragindako beharrei erantzutearekin batera aurreikusitako ekimenak ere gauzatu ditu Debako Udal Gobernuak 2020an

Urte berria hastearekin batera, eta aurrera begira jartzeko, beharrezkoa da aurrekoaren balantzea egitea. Hori da, hain zuzen ere, Debako Udal Gobernuak egin duena. 2020 urtea berezia izan da eta eskatu du aurreikuspenak eta lehentasunak moldatzea. Horretarako gaitasuna izan du Debako Udal Gobernuak eta esfortzua egin du horiez gain aurreikusitako erronkei ere aurre egiteko. Balantze positiboa egin du Gobernu taldeak.

Urte berezia izan da 2020a. Martxotik aurrera osasun krisiak denean eragin baitu, krisi sanitarioa zena, politikoa, ekonomikoa eta soziala ere bihurtu baita hilabeteek aurrera egin ahala. Lehentasunetan aldaketak egin beharra eragin zuen egoera horrek eta zaintzaren arlora bideratu genituen indarrak”, Gilen Garcia alkateak azaldu duenez. 

Egoera zaurgarrian zeuden pertsonak eta pandemiak ekonomikoki gehien kaltetu dituen sektoreak laguntzera bideratu zen Udalaren lana martxotik aurrera. “Ez baitugu nahi inor atzean utziko duen herririk”, alkatearen esanetan. 

Ildo horretan egindakoetako batzuk aipatzearren: boluntarioz osatutako zaintza sarea bultzatu eta koordinatu zen Itziarko Auzo Udalarekin eta Gurutze Gorriarekin elkarlanean pandemiaren lehen hilabeteetan; pertsona etxegabeentzat erromesen aterpetxea zabaldu zen; elikadura bankurako elikagaiak lortu eta kudeaketa bideratu da Caritasekin elkarlanean; uda sasoian egoera zaurgarrian zeuden haur eta gazteei zuzendutako hezkuntza-zaintza sarea sortu zen... 

Malgutu ziren zergen kobrantzak herritarren egoera ekonomikoa arintze aldera. Bestetik, pandemiak bereziki kaltetu dituen ostalaritzaren eta merkataritzaren sektoreak laguntzeko hainbat neurri hartu ziren. Besteak beste, tasa eta zergak murriztu, bertako merkataritza sustatzeko erosketa bonoen kanpainak egin dira...

Amillagako proiektuaren aldaketa onartu da. Errementeri-Mogel martxan jarri da.

Udalaren jarduna eraginkortzeko, eta aurretik hartutako konpromisoak betez, II. Berdintasun Plana onartu da; ordenantza fiskalak eguneratu ditugu; lanpostuen zerrenda landu da.

Bestetik, agroekologiaren aldeko herrien sarean sartu da Deba 2020an. Merkataritza biziberritzeko plana egin da eta bideen ordenantza berritu eta onartu da.

Egoerak ahalbidetu duen neurrian, kultura eta kirolaren aldeko apustuari eutsi diogu, herri bizia nahi dugulako, herri sortzailea. Kulturarik gabeko herrian ez dugulako sinisten”, esan du alkateak. Ildo horretan aipatzekoak dira udakokontzertuak, Iturri ondoan, Tene Mujika beka, kale margo lehiaketa...

Aurreikus daitekeenez, 2021a ere ez da erabat ohikoa izango. Hori horrela, zaintzeko deia berretsi nahi die Udalak herritarrei.