San Roke jai parekideak eta erasorik gabekoak

Jaiak ingurukoez, dantzaz, musikaz, … oro har, festaz gozatzeko dira, noski. Baina, aurten ere, Udalak herritarrei gogorarazi nahi die San Roke jaiak parekideak eta erasorik gabekoak izan behar direla.

Horren harira, abuztuaren 2an Gaztelekuko gaztetxoek txapak eta eskumuturrekoak banatuko dituzte udaletxeko arkupetan, 12:00etatik 13:30era bitartean. Txapetarako bi diseinu egin dira; batetik, “Jaixetan aske!” leloa duena, eta bestea “Euskaraz aske!” lelopean Tene Mujikaren ilustrazioa duena.

Tarte horretan bertaratu ezin direnek Turismo Bulegoan izango dituzte eskuragai abuztuaren 3tik aurrera, bulego ordutegian (astelehenetik larunbatera 10:00-15:00 eta 16:00- 19:00, eta igande eta jai egunetan 10:00-14:00).

Horrez gain, tabernariei erasoen aurrean nola jokatu azaltzen duen protokoloa banatuko zaie, eta baita pegatinak ere, “Hemen ez da eraso matxistarik, LGTBIfobikorik, xenofoborik edota arrazistarik onartzen!” leloarekin.

Debako eta Itziarko Talde Feministak “Indarkeria Matxistaren aurkako protokoloa” diseinatu du udaberrian zehar, eta hau ere indarrean egongo da San Roke jaietarako. Eraso matxista baten aurrean herritarrok nola jokatu zehazten duen 5 puntuko protokoloa, hain zuzen.

Abuztuaren 15ean SexuBizi babes gunea egongo da Zumardian, 00:00etatik 03:00etara. SexuBizi Babes Guneak babes lekua eta gune segurua eskaintzen du. Bertan, genero indarkeriari aurre egiteko bitartekoak eskuratu ahal izango dira, baita sexualitateari buruzko informazioa eta materiala ere.