Tene Mujikaren lanak digitalizatu ditu Jakinek

2022/05/13
Emakume Abertzale Batzaren mendeurrenean, eskuragarri jarri ditu bederatzi kideren obra osoa eta elkarteari buruzko hainbat lan Jakinek haren webgunean. Tartean dago Tene Mujika debarraren lana ere. Debako Udalak proiektua lagundu du.

Jakinek martxan duen euskal pentsamenduaren transmisiorako proiektu digitalaren atal berri bat osatzen dute EABko bederatzi idazleek. «XX. eta XXI. Mendeko euskal pentsamenduaren transmisioa 90 hamarkada bueltan abiatutako proiektu handia da», Jakineko zuzendari Lorea Agirrek azaldu aurkezpenean azaldu zuenez. Hainbat egile ezagunen obra digitalizatua dago eskuragarri bertan: Carlos Santamaria, Azkue, Villastante, Joan Mari Torrealdai, Joxe Azurmendi... eta Juan San Martinena dute eskuartean orain. 

Proiektu horren baitan, 2018an osatu zuten orain aurkeztu den obra digitalizatzeko egitasmoa, Bilbao 700 III Millenium Fundazioaren laguntzarekin egin zen. Agirrek zehaztu nahi izan du orain arte pentsamenduaren transmisioan gizonen lanak nabarmendu direla, baina bolumena apalagoa izan arren, garrantzia izugarria duela emakume hauen lanak: «ez zegokien eremu batean sartuz, pronostikoen kontra eta garaian esleitzen zitzaizkien lanetatik kanpo, bestelako baldintzapenetan» sortu zituztelako. Horregatik uste du, emakume hauen lana baloratzeko ezinbestekoa dela beste begirada bat izatea: «ezin da bolumen edo jorratutako gaien baitan soilik aztertu, baizik garaiko errealitateak inposatzen zizkien ezinen argitan aztertu behar dugu». 

Emakume Abertzale Batzako bederatzi idazleren –Julene Azpeitia, Errose Bustintza, Karmele Errazti, Miren Etxabe, Julia Fernandez Zabaleta, Tene Mujika, Polixene Trabudua, Sorne Untzueta eta Elbire Zipitria– idazlan argitaratu guztiak katalogatu eta digitalizatu dira. Debako Udalaren laguntza ere izan du proiektuak.