Turismo bulegoko harrera eta komunikaziorako administrari laguntzaileen lan-poltsa berria eratuko du Udalak

Pasa den otsailaren 23ko Tokiko Gobernu Batzordearen bileran erabaki zen Debako turismo bulegoko harrera eta komunikaziorako administrari laguntzaileen lan-poltsaren oinarriak onartzea eta deialdia egitea. Deialdi honen xedea Debako Turismo bulegorako administrari laguntzaileen lan-poltsa sortzea da eta aldi baterako sortzen diren postu honetarako beharrak betetzeko erabiliko da.

Eskaerak aurkezteko epea, Gipuzkoako Aldizkari Ofizialean deialdia argitaratu eta biharamunetik kontatzen hasita 20 egun naturaleko epean bukatuko da; hau da, interesatuek martxoaren 28ra arte izango dute beren eskaerak aurkezteko aukera.

Hautapen-prozesuan parte hartu ahal izateko, izangaiek baldintza orokorrak ez ezik, honako hauek ere bete beharko dituzte:

• Eskaerak aurkezteko epea amaitzen den egunean 16 urte beteta edukitzea.

• Eskola graduatu titulua, Lanbide Heziketako lehen maila edo titulu baliokideren bat izatea.

• Euskara: 3. hizkuntz-eskakizuna edo horren baliokidea egiaztatzea.

• Frantses eta ingeleseko B2 maila egiaztatzea.

• Honako IT txartelak izatea: Word eta Excel maila aurreratua, 2000 bertsioa edo ondorengo edozein bertsio.

Behin eskaerak aurkezteko epea bukatuta, alkate-lehendakariak onartu eta baztertutako izangaien behin-behineko zerrenda onartu eta Udalaren web orrian eta iragarki-oholean argitaratuko du. Hautapen-prozesua oposizio-lehiaketa bidezkoa izango da.

Deialdiaren oinarriak eta izen-emate orria ikusteko, klikatu hemen.