Udal-euskaltegian egon daitezkeen beharrak betetzeko euskara-irakasleen lan-poltsa osatuko da

Udal-euskaltegian egon daitezkeen beharrak betetzeko euskara-irakasleen lan-poltsa osatzeko erabakia hartu du Eibarko gobernu batzarrak. Lan-poltsa hau osatzeko deialdiaren oinarriak pasa den ostiraleko Gipuzkoako Aldizkari Ofizialean daude argitaratuta. Deialdiaren xedea Euskaltegiko irakasleen ordezkapenak egitea da eta lan-poltsa osatzeko bidea lehiaketa izango da.

Epaimahaiak ondorengo meritu hauek baloratuko ditu: HABEk ziurtatutako esperientzia irakaskuntzan, titulu-akademikoak, helduei euskara irakastearekin zerikusia duten HABEk, EHUk, UNEDek, UEUak edo IVAPek emandako ikastaroak eta informatika-ezagutza.

Lehiaketan lortutako puntuazioen batuketak ezarriko du lan-poltsako behin betiko sailkapen-ordena. Lehiaketatik irteten den lan-poltsa indarrean egongo da harik eta deialdi berri bat egin arte, eta indarrik gabe utziko ditu lanpostu hori betetzeko Eibarko Udalak ordura arte egin dituen beste prozesu edo aukeraketak. Lan-poltsaren bidez kontratatutako pertsonek probaldi bat gainditu beharko dute. Probaldia gaindituko ez balu, izangaiak kontratatzeko eskubide guztiak galduko lituzke, eta lan-poltsatik kanpo geratuko litzateke.

Eskabideak eredu ofizial normalizatuaren arabera aurkeztu behar dira; eredua Eibarko Udalaren Herritarren Zerbitzurako Bulegoan eta webgunean eskuratu daiteke. Interesatuek 2016ko uztailaren 22ra arte izango dute izena emateko epea.