Urtarrilaren 30erako greba deialdiarekin bat egin du Debako udal gobernuak

2020/01/29
Herritarrei jakinarazi nahi zaie, udaleko langileek euren grebarako eskubidea egikarituz gero, zerbitzuetan eragina izan dezakeela greba deialdiak.

Lan, pentsio eta bizitza duinerako eskubidea bermatu behar zaie pertsona guztiei. Oinarrizko aldarrikapena iruditzen zaigu, bizitza erdigunean jarri eta bestelako eredu bat oinarri eraiki dezagun gizarte hobea”, Gilen Garcia alkatearen ustez. 

Pentsioena denon afera da, oraingo pentsiodunena nahiz etorkizunekoena; bestetik, lan baldintza duinen aldeko borroka ezinbestekoa da; azkenik, eskubide sozialak bermatu behar dira. Finean, bestelako eredu sozio-produktiboa eraiki behar dugu, bizitza erdigunean jartzeko, zaintzari eta planetaren jasangarritasunari lehentasuna emanez. 

Euskal Herriko Eskubide Sozialen Kartak pentsiodunen mugimendurekin batera adostu duen Adarrikapen Taularekin bat egiten du. Alegia, aberastasunaren birbanaketa, sektore publikoaren lidergoa, eskubideen unibertsaltasuna, euskararen normalizazioa, lurraldeen arteko oreka, jendartearen beharren arabera antolakuntza (lehen sektorea, azpiegiturak, merkantzien eta garraio sektorea...).