Urte Berriko Feriaren edizio berriak 69 postu izango ditu

2024ko urtarrilaren 3a

• Urtarrilaren 6an izango da, hilabeteko aurreneko larunbata, goizeko 09:00etatik aurrera.

Urte Berriko Feriaren edizio berri bat izango da larunbat honetan, urtarrilaren 6an; tradizio handiko ‘soro feria’ honen helburua da baserriko tokiko produktuen garrantzia eta kalitatea goraipatzea. Aurten, 69 postu izango dira azokan, besteak beste, frutak, barazkiak, eztia, gazta, ogia, pastela, gozokiak, erroskillak, taloak, txorizoak eta ganadua. Bertako zein bisitariek jarduera tradizionalez eta lehiaketa ezberdinez gozatzeko aukera izango dute egunean zehar. Beti bezala, espazio hauetan egongo da feria: Plaza Berria, Plaza Zaharra, Estalitako Pasealekua, Kioskoa, Portu Kalea, Arakistain Plaza.

·       Frutak, 2 postu
·       Barazkiak, 8 postu
·       Eztia, 5 postu
·       Gazta, 8 postu
·       Ogia, pastela, goxokiak, erroskilak, 4 postu
·       Taloak eta txorizoak, 6 postu
·       Beste janari eta edariak (sagardoa, txerrikiak, pateak, arraultzak), 7 postu
·       Landareak, 2 postu
·       Ganadua, postu 1
·       Bestelakoak (egurrezko tresnak, kosmetika, xaboiak, argazki zaharrak, botak, zorroa, pitxiak, koadroak…), 26 postu

Ekitaldiak 09:00etan hasiko dira, epaimahaiaren lanarekin eta bertako produktuen salmentarekin. 10:30etatik aurrera, berriz, musika eta dantza izango da nagusi kaleetan,  trikitilarien kalejirarekin; horrez gain, egunean zehar beste hainbat musika eta dantza emanaldi ere izango dira. Urte Berriko Feriaren sari banaketa berriz, 13:30etarako dago programatuta.

Bost lehiaketa izango dira: batetik Barazki lehiaketa-erakusketa eta Fruta lehiaketa-erakusketa izango dira, eta bertan baserritarrek landatu eta ekoiztutako frutak eta barazkiak sarituko dira; bestetik Gazta sariketa-erakusketa izango da, eta Latxa eta/edo Karrantza ardi gazta onenak sarituko dira; eta azkenik, eskualdeko XVII. Ezti Lehiaketa egingo da, tokiko ekoizpen onenak nabarmenduz. Eta azkenik, Feriako postu onenarentzat saria ere izango da.

Udalak parte hartzera eta bertako nekazaritza eta kulturaren onena ospatzen duen azoka hau bisitatzera animatu ditu herritarrak eta bisitariak, zaporez eta tradizioz betetako ekimen honekin gozatzera.