XLV. Kaleko margo sariketako irabazleak

2014/09/13
Eguraldi ederrarekin ospatu da Diego Sagredo Fundazioak, Haitz-Haundi Elkarteak eta Udalak elkarlanean antolatutako XLV. Kaleko margo sariketa. Debako txoko ezberdinak islatzen dituzten 27 artelanek parte hartu dute lehiaketan eta 8 izan dira sarituak. Lanak erakusgai eta salgai egongo dira irailaren 14tik 21era Agirre Jauregian.

Jatorri eta adin ezberdineko 28 margolari gerturatu dira goizeko 9etarako Agirre Jauregira euren mihiseei zigilua jartzera; helburua bakarra: XLV. Kaleko margo lehiaketan parte hartzea eta Debako udalerriaren esentzia jasoko duen margolana ordubiak baino lehen amaitzea.

Urtez urte margolari gehiago gerturatzen dira lehiaketara. Aurten 28. Eguerdiko 14:00etan Agirre Jauregian entregatutako lanak ordea 27 izan dira azkenean. Aurtengo epaimahaiko kideak Ana Salegi, Juan Luis Baroja Collet, Jose Agustín Larrañaga, Dioni Murua, Javier Cardenas eta Isabel Aberasturi izan dira eta aho batez, honako sariak ematea erabaki dute:

  • 1go saria 600€ - Leticia Gaspar Garcia (Plentzia)
  • 2. saria 450€ - Eduardo Alsasua (Gasteiz)
  • 3. saria 300€ - Jose Ignacio Amelivia (Logroño)
  • Saritu gabeko herriko lehen klasifikatua 200€ - Jaime Zamakola

Diego Sagredo Fundazioak eskainitako sari bereziak:

  • 4. saria 300€ - Juan Berrozpe (Donostia)
  • "Mª Esperanza Chávarri Saria" akuarelarik onena 300€ - Juan Carlos Lang (Bilbo)
  • "Marques de Prado Ameno Saria" 5. saria 150€ - Mª Teresa Durá (Elche)
  • "Blanca Vilallonga Saria" Itsasoa gaitzat duen margolanei zuzenduta 300€ - Olga Parra (Torrevieja)

 

Debako Udalak 4 sari eman ohi ditu eta Diego Sagredo Fundazioak beste 4. Aurten guztira 2.600 euro banatu dira 8 saritan. Saritutako lanen artetik lehen saria eta herriko saritua Debako Udalaren jabetzan geldituko dira; eta Maria Esperanza Chavarri eta Marques de Prado Ameno sari bereziak berriz Diego Sagredo Fundazioaren jabetzan. Aurten 21 urtetik azpiko margolariei zuzendutako azken sari honek ezin izan du adin honetako partehartzailerik saritu, tamalez ez baita inor aurkeztu. Hala, Fundazioak 150 euroko sari hau 5. sarituari ematea erabaki du. 

Lehiaketara aurkeztutako lan guztiak Agirre Jauregian egongo dira ikusgai irailaren 14tik 21era eta lanak erosteko aukera ere izango da. Astelehenetik larunbatera arratsaldeko 18:00etatik 20:00etara egongo da zabalik erakusteta; igandean berriz, 12:00etatik 14:00etara.