Zaintza ekosistemak lantzen, analisi parte-hartzailea egiteko bi hitzordu

2022ko ekainaren 27aZaintza ekosistemak lantzen, analisi parte-hartzailea egiteko bi hitzordu

Berdintasun Batzordean puntu ilunen azterketa egiteko asmoak, azkenean, hirigintza antolamendua ikuspegi zabalago batetik, eta genero perspektibatik, aztertzera eraman du Debako Udala. 'Hiri debekatuaren mapa', 'Mapa Morea'… izen edo kontzeptu ezberdinak erabili izan ohi dira gisa honetako azterketetan.

Amaia Arozena Txurruka herritarra martxoa erdialdean hasi zen Ekonomia Gradu amaierako lana burutzen Debako Udalean. Debako eta Itziarko hirigintza aztertzen dihardu, genero ikuspegitik. Zaintza, segurtasuna, autonomia, mugikortasuna… arlo ezberdinak ditu hizpide bere lanean; eta, alor praktikoa osatzeko, partaidetza saioak egingo ditu aste honetan. 

Saio hauen helburua herritarren ekarpenak jasotzea izango da. Azterketa honen oinarriak azaldu eta gidari lanak egingo ditu Arozenak. 

Bi saio antolatu dira: ostegunean (ekainak 30) Deban, Ispiluen Gelan; eta ostiralean (uztailak 1) Itziarren, Burugorri Gainean.