“Egin apustu frutaren alde, beti da bere garaia” izeneko kanpainak Debako hondartzan egingo du bihar geldialdia

2018/07/25
Ekimenak frutaren kontsumoa sustatu eta sasoikoak noiz diren jakitera eman nahi du. Lehen edizio honetan, Gipuzkoako itsasertzeko 6 hondartza bisitatuko ditu: Hondarribia, Donostiako Zurriola, Kontxa eta Ondarreta, Zarautz eta Deba.

Gazteek ez omen dute gomendatzen den adina fruta eta barazki kontsumitzen. Izan ere, eguneko 5 errazio (400gr/egun) hartu behar ditugu gutxienez, NAOS Estrategiak (Nutrizio, Jarduera Fisikorako Estrategia eta Obesitatearen Prebentzioa) adierazten duen moduan.

Eusko Jaurlaritzaren azken osasun inkestaren arabera, euskal gazteriak ez du fruta egunero kontsumitzen. Baina, joerak hoberantz egin beharrean, okerrera jo dezake; E.A.E. Business School-eko La alimentación saludable en España ikerketaren arabera, Euskadi baita, urtean opil eta gaileta gehien kontsumitzen duen bigarren autonomia erkidegoa.

Egoera honen aurrean, enpresa gipuzkoar batzuk, besteren artean, Super Amara, On Estrategia, Grupo Delta, Así Sí Comunicación, Comunícamelo eta Arantza Lopez-Ocaña doktoreak kanpaina sozial bat abiarazi dute, frutaren kontsumoa sustatu eta sasoikoak noiz diren jakitera emateko. Gainera, Donostiako, Hondarribiako, Zarauzko eta Debako udaletxeen nahiz kirol-kluben babesa jaso du, azken hauen kideak banaketa lanetarako boluntario eskaini dira-eta.

20.000 fruta ale gipuzkoar itsasertzeko hondartzetan

Uztailean zehar, 20.000 fruta ale inguru banatuko dira kanpaina horren baitan; batez ere, nektarinak eta platerinak. Banaketa hori dagoeneko Gipuzkoako bost hondartzatan egin da: Hondarribia, La Concha, Zurriola eta Ondarreta Donostian eta Zarautzen. Bihar, uztailak 26, Debako hondartzan emango diogu bukaera ekimen honen lehen edizioari.

Kanpainaren irudiarekin identifikatuko den karpa bat ipiniko da pasealekuan, 11:00etatik 14:00etara, eta boluntarioek fruta eta informazio-liburuxka banatuko dituzte, baita sasoiko frutaren egutegia eta galdetegi bat ere, modu boluntarioan betetzeko.

Antolatzaileek inkesta bat prestatu dute, gure lurraldean zer nolako fruta kontsumoa egiten den jakiteko. Nahi duenak galdetegia bete eta hondartzan kokatuta egongo den karpan entregatu dezake. Nahi izanez gero, online egiteko aukera ere badago, www.apuestaporlafruta.eus web orrian. Parte hartzen duten guztien artean, eta kanpaina amaitu ostean, zozketa egingo da, eta irabazleak bere pisua frutan irabaziko du.

Gure osasunarentzat onuragarria

Egunero fruta kontsumitzea oso onuragarria da gure organismoarentzat. Arantza López-Ocaña doktorearen hitzetan “frutak, kontutan eduki beharreko ekarpen energetikoa suposatzen du, bertan aurkitzen diren azukre naturaletan aberatsa delako. Gainera, fibra ematen digu idorreriari aurka egiteko, kolesterola eta triglizerido altua neurrian mantentzen ditu. Frutak kontsumitzeak, beste jarraibide osasuntsuekin batera, kantzerra prebenitzen ere laguntzen du. Hidratazio egokia edukitzen laguntzen du, ezinbestekoa batez ere udan eta gainera bitaminak, mineralak, antioxidatzaileak ematen dizkigu”.